Qusar rayonunun Laza kəndində maraqlı təbiət hadisəsi yaşanıb.
Far.Az xəbər verir ki, bu barədə görüntülər sosial şəbəkələrdə yayılıb.
Belə ki, ölkə ərazisində müşahidə olunan qeyri-sabit hava şəraiti fonunda kənd ərazisindəki çaydan sel keçib. Lakin sel bir növ vulkan lavalarını xatırladıb və görənləri təəccübləndirib. Bəzi istifadəçilər baş verən təbiət hadisəsinə ad verə bilməyib.
Məsələni aydınlaşdırmaq üçün ekoloq-hidroloq Rövşən Abbasovla əlaqə saxladıq. O, Far.Az-ə verdiyi açıqlama verərək bildirib ki, bu təbiət hadisəsinə palçıqlı sel deyirlər. Azərbaycan ərazisindən keçən çaylar üçün xarakterikdir.
"Qısa müddət ərzində çay məcrasına sel daxil olur. Sellər adətən 3 qrupa - daşlı, daşlı palçıqlı və palçıqlı sellər olaraq ayrılır. Lazada qeydə alınan palçıqlı seldir. Daşlı sellər daha güclü və dağıdıcı olurlar. Bu uzun müddət ərzində hövzəyə yağışın düşməməsi və qəflətən düşməsi hövzədə olan qırıntı materiallarının axınla aşağı gəlməsinə səbəb olur. Belə hadisələr yaranır. Bu hadisə Böyük Qafqazın çayları üçün o qədər də qeyri-adi hal deyil. Müntəzəm olaraq baş verir. Yerli sakinlər adətən belə hadisədən qorunmağı yaxşı bilir, bu turistlər üçün bir qədər yaddır",- deyə ekspert vurğulayıb.
