Dörd fəslin yaşandığı Türkiyə, payız mövsümündə də unudulmaz mənzərələr və rəngarəng istirahət imkanları təqdim edir. İsti yay aylarında turistlərin üz tutduğu məşhur guşələr payızda da cazibəsini qoruyur. Türkiyədə payızda səyahət etmək üçün ən gözəl məkanlar bunlardır:
1. Ağva – İstanbul yaxınlığında təbiət və dincəlmək
İstanbula gələn turistlər arasında Ağva xüsusi maraq doğurur. Şəhərin gurultusundan uzaqlaşmaq istəyənlər burada Göksu çayının sahilində dincələ, Şilə qalası və Ağva fənərini ziyarət edə, Ağlayan Qaya qarşısında mənzərənin dadını çıxara bilərlər. Kilimli marşrutu boyunca təbiət yürüşləri, çay kənarında qayıq turları və yerli restoranlarda yemək dadmaq ziyarətçilərə unudulmaz anlar bəxş edir.
2. Yedigöller – Boluda payızın rəngləri
Yedigöller Milli Parkı, yeddi gölü və sıx meşələri ilə payızın ən gözəl mənzərələrini təqdim edir. Bölgədə göllər ətrafında yürüş etmək, kamp qurmaq, Kapankaya təpəsinə qalxaraq Pisagor ağacı və Gülən Qayalari görmək mümkündür. Maral yetişdirmə təsərrüfatları və Yığılca Saklıkent şəlaləsi də ziyarətçilərin maraq göstərdiyi məkanlardandır.
3. Maşukiyə – Kocaelidə təbiət və kənd həyatının harmoniyası
“Maşukiyəyə payızda gələn aşiq olar” deyimi bölgəni təsvir edir. Aygır dərəsində kiremitdə alabalıq yeməyi, Sapanca gölündə kanoe və su velosipedi, Kuzu və Kirazlı yaylalarında dincəlmək, kənd yarmarkasından təzə məhsullar almaq Maşukiyəni unudulmaz edir.
4. Kapadokya – Tarixi və təbii möcüzələr
Kapadokya, balon turları ilə dünya üzrə məşhurdur. Peribacaları, Göreme Milli Parkı, Aşiq Vadisi, Uçhisar qalası, Ihlara vadisi, Zelve Ören Yeri və Paşabağ Rahiblər vadisi kimi məkanlar turistlər üçün həm tarixi, həm də təbii gözəlliklər təqdim edir.
5. Çamlıhemşin – Rize dağlarının sükutu və təbiət möcüzələri
Ayder yaylası, Gəlin Tülü şəlaləsi, Tunca vadisi, Mikron körpüsü, Pokut yaylası, Fırtına çayı üzərindəki Şenyuva körpüsü və Zil qalası ziyarətçilərə payızın sərin havasında həm sakitlik, həm də möhtəşəm mənzərələr bəxş edir.
Payızda Türkiyədə səyahət edənlər üçün Ağva, Yedigöller, Maşukiyə, Kapadokya və Çamlıhemşin kimi məkanlar həm təbiət, həm mədəni irs, həm də əyləncə baxımından ideal seçimlərdir.
