BAKI, 22 sentyabr. TELEQRAF
Bugünkü dünyada fəaliyyətin əhəmiyyəti böyükdür və qeyd etmək lazımdır ki, son onilliklərdə dünya əsasən bir neçə ölkə tərəfindən idarə olunub. Amma bu tendensiya dəyişir və artıq biz qlobal dəyişimin Körfəz ölkələrinə, Cənubi Qafqaz ölkələrinə, Mərkəzi Asiya və Cənub-Şərqi Asiya ölkələrinə yönəldiyini görürük. Bu ölkələr təkcə ticarətdə deyil, həm də texnologiyanın inkişafında, ona təsirdə və onun formalaşmasında mühüm rol oynayırlar.
Teleqraf xəbər verir ki, bu barədə Azərbaycanın rəqəmsal inkişaf və nəqliyyat naziri Rəşad Nəbiyev Bakıda keçirilən 1-ci Azərbaycan Beynəlxalq İnvestisiya Forumunda (AIIF-2025) qeyd edib.
Nazir qeyd edib ki, ötən il qlobal ticarətin həcmi təxminən 33 trilyon ABŞ dollarına yaxın olub:
“Əvvəlki illərlə müqayisədə ötən il tranzit marşrutlarının şaxələndirilməsi daha çətin idi. Ölkələr mövcud vəziyyətdən razı deyildilər və bu səbəbdən bütün tərəflər, o cümlədən ölkələr Azərbaycanı Şərqlə Qərb arasında marşrutların şaxələndirilməsində mühüm rol oynaya biləcək tərəf kimi dəyərləndirdilər.
Son onilliklərdə biz yalnız infrastruktur qurmaqla kifayətlənməyib, eyni zamanda ölkələri bir araya gətirməkdə də fəal olmuşuq. Bu gün Orta Dəhlizlə bağlı sevindirici hal odur ki, onu yalnız bir ölkə idarə etmir. Bu, mehriban qonşuluq fəlsəfəsinə əsaslanan, sülh və ortaq məqsədlərlə bir-birindən faydalanan ölkələrin təşəbbüsüdür”.
Rəşad Nəbiyev əlavə edib ki, hazırda qarşılıqlı asılılıq fəlsəfəsi rəhbər tutulur:
“Uğurun hər birimiz üçün ortaq olduğunu anlayırıq. Buna görə də biz təkcə infrastruktur layihələrimizi deyil, onların ən səmərəli istifadəsini də koordinasiya edirik. Son illərdə, ərazilərimizin azad edilməsindən sonra müzakirə edilən əsas mövzulardan biri Orta Dəhlizin şaxələndirilməsi idi. Cənab Prezidentin irəli sürdüyü Zəngəzur dəhlizi ideyası bu baxımdan xüsusi əhəmiyyət kəsb edir. Son beş ildə biz bu gündəliyi irəli aparmışıq və bu ilin avqustunda dəhliz beynəlxalq arenada da təsdiqlənib.
Üçtərəfli görüş zamanı Zəngəzur dəhlizinin Orta Dəhlizin əsas arteriyası olacağı barədə vizyon ortaya qoyulub. Biz bu dəhlizi mövcud marşrutlara alternativ yox, əksinə, mühüm arteriya kimi görürük. Çünki hava şəraiti imkan vermədikdə daha çox yükün daşınmasına şərait yaradacaq. Ümumilikdə dəhlizlə illik təxminən 15 milyon ton əlavə yük daşına biləcək.
Vacib məqam ondan ibarətdir ki, biz bu dəhlizi yalnız tranzit marşrutu kimi deyil, həm də onun üzərində yerləşən ölkələrin qarşıdakı onilliklərdə rifahını təmin edəcək strateji yol kimi görürük”.
