ABŞ-ın Nyu-Hempşir ştatında yerləşən nüfuzlu "Sky Meadow Country Club"da silahlı insident baş verib.
Musavat.com xəbər verir ki, hadisə 20 sentyabr 2025-ci il, şənbə günü axşam saatlarında Naşua şəhərində qeydə alınıb.
Yerli vaxtla təxminən 19:30-da klub ərazisində atəş səsləri eşidilib. Hadisə Boston şəhərindən təxminən 70 kilometr şimal-qərbdə, Massaçusets sərhədinə yaxın ərazidə baş verib.
Şahidlərin sözlərinə görə, insanlar təşviş içində binanı tərk ediblər. Klub rəhbərliyi dərhal polis və təcili tibbi yardım çağırıb.
Nyu-Hempşir ştatı polisinin məlumatına görə, bir neçə nəfər odlu silah yaralarından ölüb. Yaralıların dəqiq sayı və vəziyyəti barədə hələlik rəsmi açıqlama verilməyib.
Hüquq-mühafizə orqanlarının bildirdiyinə görə, müşahidə kameraları hadisənin tək atıcı tərəfindən törədildiyini təsdiqləyib.
Polis onun qısa müddətdə saxlandığını açıqlayıb.
Axtarış tədbirləri zamanı genişmiqyaslı xüsusi əməliyyat həyata keçirilib. Qonşu Massaçusets ştatının Dunstable şəhərində əhalinin təhlükəsizliyi üçün hətta “evdə qal” əmri verilib.
Hazırda federal qurumların da iştirakı ilə insidentin səbəbləri və şübhəlinin motivləri araşdırılır.
Hadisə, adətən sakitliyi və təhlükəsizliyi ilə seçilən Naşua şəhəri üçün gözlənilməz olub. "Sky Meadow Country Club" isə toylara, ziyafətlərə və idman tədbirlərinə ev sahibliyi edən nüfuzlu məkan kimi tanınır.
Qeyd edək ki, ABŞ-da son dövrlər silahlı insidentlərin sayı artıb. Bir neçə gün əvvəl, sentyabrın 17-də Pensilvaniya ştatının York qraflığında baş verən atışma nəticəsində üç polis əməkdaşı həlak olmuş, iki nəfər isə ağır yaralanmışdı.
Musavat.com
