BAKI, 19 sentyabr. TELEQRAF
Özbəkistan Xarici İşlər Nazirliyi Ukrayna Xarici İşlər Nazirliyi və Baş Prokurorluğuna nota göndərib.
Teleqraf xəbər verir ki, bu barədə Özbəkistan Xarici İşlər Nazirliyinin mətbuat katibi Axror Burxanov məlumat verib.
Notaya səbəb 13 Özbəkistan vətəndaşının Ukraynada qeyri-insani şəraitdə, qul kimi işlədilməsi olub.
Özbəkistanın Ukraynadakı səfirliyinin əməkdaşları vəziyyəti araşdırmaq üçün hadisə yerinə gedib və vətəndaşlar yerli xəstəxanaya yerləşdirilib.
"Səfirlik vətəndaşlarımızla bağlı vəziyyəti tam nəzarətə götürüb və onların Özbəkistana qayıtmasını təmin etmək üçün bütün lazımi tədbirləri görülür. Özbəkistan vətəndaşlarına konsulluq və hüquqi yardım göstərilməsi üçün Ukrayna Xarici İşlər Nazirliyinə və Baş Prokurorluğuna müvafiq notalar göndərilib", - Burxanov Telegram-da yazıb.
Özbəkistan Xarici İşlər Nazirliyi vətəndaşlarına Ukraynaya səfərdən çəkinməyi tövsiyə edir. “Ukraynada insan həyatı üçün təhlükə yarada biləcək hazırkı vəziyyətlə əlaqədar olaraq, biz Özbəkistan vətəndaşlarına öz təhlükəsizliklərini nəzərə alaraq, indiki vaxtda həmin ölkəyə səfər planlaşdırmamağı tövsiyə edirik”, - deyə Özbəkistan diplomatiyasının sözçüsü bildirib.
