Rusiya Danimarkanı nüvə təhlükəsi ilə bağlı xəbərdar etdi
Ajans.az xəbər verir ki, yay aylarında imzalanmış 10 illik ABŞ-Danimarka müdafiə sazişinin ilkin variantından “sülh dövründə Danimarkada nüvə silahı yerləşdirilməyəcək” ifadəsi çıxarılıb. Yeni razılaşma ABŞ-a Karup, Skrydstrup və Aalborg hava bazalarında daimi qoşun yerləşdirmək və silah ehtiyatı saxlamaq imkanı verir. Barbin iddia edib ki, Danimarka ABŞ-ın gətirdiyi silahlar üzərində heç bir nəzarətə malik olmayacaq. Onun sözlərinə görə, bu, “Danimarka ərazisində nüvə silahlarının yerləşdirilməsinin real təhlükəsinə” gətirib çıxara bilər. Səfir əlavə edib ki, Danimarka artıq 2023 və 2024-cü illərdə ABŞ tərəfindən Bornholm adasında keçirilən hərbi təlimlərdə nüvə başlıqlı “Tomahawk” raketləri buraxa bilən “Typhon” sistemləri ilə zərbələrə imkan verib. Barbin bu addımları Rusiyanın təhlükəsizliyinə, o cümlədən Kalininqrad vilayətinə qarşı birbaşa təhdid kimi qiymətləndirib: “Danimarka bu gün Rusiyanın təhlükəsizliyinə qarşı istifadə olunan aktivlərdən birinə çevrilib. Bu cür düşmənçilik fəaliyyəti ölkəmiz tərəfindən cavabsız qalmayacaq.” Diplomat həmçinin Norveçin “Britaniya və Fransa nüvə qüvvələrinin maliyyələşdirilməsində Danimarka büdcəsinin istifadəsi” kimi ideyalar səsləndirdiyini iddia edib. Bu cür təşəbbüslərin məqsədi, onun sözlərinə görə, Rusiyaya Danimarkanın “nüvə ilə cavab verməyə qadir olduğunu göstərmək”dir. MGIMO Universitetinin Siyasi Nəzəriyyə kafedrasının dosenti İvan Loşkarev məsələyə münasibət bildirərək qeyd edib ki, ABŞ-ın Danimarkada nüvə qüvvələri yerləşdirməsi hərbi baxımdan məntiqli deyil: “Bu, nə uçuş məsafəsini azaldır, nə də Rusiyanın yeni ərazilərini zərbə altına qoyur. Əsas risklər Arktika regionunun hərbiləşdirilməsi və Rusiyanın Şimal Dəniz Marşrutuna təhdiddir. Bu baxımdan, Norveç və İsveç daha perspektivli mövqelərdədir.” Hazırda təxminən 100 ABŞ-a məxsus B61 tipli nüvə bombası Belçika, İtaliya, Almaniya, Niderland və Türkiyədəki altı aviabazada saxlanılır. Müharibə vəziyyətində bu silahlar yerləşdikləri ölkələrin hərbi təyyarələrində istifadə oluna bilər, lakin son qərarı yalnız ABŞ komandanlığı verir. Bununla yanaşı, 2025-ci ilin mart ayında Fransa prezidenti Emmanuel Makron bəyan etmişdi ki, Avropa ölkələri Rusiyadan gələn təhdidlərə qarşı Fransanın nüvə arsenalından yararlana bilərlər. Lakin Paris bu silahlar üzərində tam nəzarəti və istifadə qərarını özündə saxlamaq niyyətindədir.
