Publika.az xəbər verir ki, tədqiqat Nature Astronomy jurnalında dərc olunub.
SETI İnstitutunun və NASA-nın Eymes Tədqiqat Mərkəzinin astronomu Piter Yenniskens xatırlayır:
"Asteroid atmosferə daxil olmamış cəmi yeddi saat əvvəl aşkar edilmişdi. Mən dərhal Hollandiyada yaşayan qardaşıma zəng etdim və o, alovlu kürəni öz gözləri ilə görə bildi".
Göy cisminin ölçüsü təxminən 72 santimetr, çəkisi isə 650 kiloqram olub. Kiçik ölçülərinə baxmayaraq, asteroid son mərhələdə ikiqat işıq saçan parlaq bolid yaradıb. Analiz asteroidin geniş yayılmış L-xondritlər - az dəmirli adi xondritlər tipinə aid olduğunu göstərib.
"FRIPON/Vigie-Ciel" şəbəkəsindən olan alimlər və könüllülərin iştirakı ilə ekspedisiya düşmədən cəmi bir neçə saat sonra Normandiyada ilk qalıqları tapmağa nail olub. Tapılan fraqmentlərdən biri cəmi 3 qram çəkidə olub - onu otların arasında, yalnız mamır üzərindəki vəziyyəti sayəsində fərqləndirmək mümkün olub.
Tədqiqatçılara görə, hadisənin əsas özəlliyi asteroidin qeyri-adi parçalanma dinamikasında olub.
"Asteroid adətən olduğundan daha uzun müddət bütöv qaldı və sonra təxminən 28 km hündürlükdə parçalanaraq cəmi bir an içində kinetik enerjisinin 98%-ni itirdi. Nəticədə konsentrasiyalı sferik zərbə dalğası yarandı", - Öryan Eqal izah edib.
NASA-nın hesablamaları göstərib ki, təhlükəli təzyiq zonası standart atmosferə girişlərlə müqayisədə dörd dəfə böyük olub. Bu isə o deməkdir ki, bu cür obyektlər yaşayış məntəqələri üçün daha ciddi təhlükə yarada bilər.
