BAKI, 19 sentyabr. TELEQRAF
Ağ Evin keçmiş əməkdaşı Ceff Zints, sabiq dövlət başçısı Cozef Baydenin yaddaşının və qərar qəbul etmə qabiliyyətinin hələ prezident vəzifəsində olarkən azaldığını etiraf edib.
Teleqraf xəbər verir ki, bu barədə “New York Post” qəzeti mənbələrə istinadən məlumat yayıb.
Onların məlumatına görə, Zints ABŞ Konqresinin Nümayəndələr Palatasının nəzarət və hökumət islahatları komitəsində ifadə verib. Keçmiş Ağ Ev nümayəndəsi qanunvericilərə bildirib ki, Baydenin hazırkı dövlət başçısı Donald Trampla debatda uğursuzluğundan sonra prezidentin müalicə həkiminə onun "tam tibbi müayinəsini", o cümlədən əqli qabiliyyət testini keçirməyi tövsiyə edib. Zints Baydenin debatdakı durğunluğunu misli görünməmiş adlandırıb.
Onun sözlərinə görə, həmin vaxt Bayden üçün "tarixləri və adları yadda saxlamaq getdikcə çətinləşirdi", qərar qəbul etmə prosesi isə daha çox vaxt aparırdı. Zints həmçinin qeyd edib ki, Baydenin həyat yoldaşı Cill ərini işlə həddindən artıq yükləməməyi xahiş edirdi.
