2025-ci ilin avqustunda Azərbaycanda kənd təsərrüfatı məhsullarının istehsalında artım müşahidə olunub. Dövlət Statistika Komitəsinin açıqladığı rəsmi məlumatlara görə, bu sahədəki illik artım tempi 8,3 faiz təşkil edib.
İlin əvvəlindən bu yana kənd təsərrüfatı məhsullarının ümumi istehsalı ötən ilin yanvar–avqust ayları ilə müqayisədə 8,9 faiz artaraq diqqətəlayiq dinamika göstərib.
Bitkiçilik məhsulları üzrə göstəricilər müsbət olsa da, artım templəri nisbətən stabildir. Avqustda bu sahədə istehsal iyula nisbətən cüzi — 0,1 faiz azalsa da, illik müqayisədə 7,1 faiz artım qeydə alınıb. İlin ilk səkkiz ayında isə bu göstərici 8,1 faizə çatıb.
Ən yüksək artım heyvandarlıq məhsullarında qeydə alınıb. İllik əsasda bu sektor 9,3 faiz, yanvar–avqust aylarında isə 9,6 faiz artım nümayiş etdirib. Bu da göstərir ki, daxili bazarda ət və süd məhsullarına olan tələbat sabit olaraq artır.
Meşə təsərrüfatı məhsullarında da müsbət dinamika müşahidə olunub. Avqust ayında bu sahədə 0,5 faiz, səkkiz ay üzrə isə 2,5 faiz artım olub. Balıqçılıq məhsulları üzrə göstəricilər isə nisbətən sabit qalıb — illik artım 1,3 faiz, yanvar–avqust dövründə isə 1,6 faiz təşkil edib.
Gülnar
