Zeytun istehsalının artırılmasını stimullaşdırmaq məqsədilə intensiv zeytun bağlarının sahəsinin genişləndirilməsi dövlət tərəfindən dəstəklənir.
Kənd Təsərrüfatı Nazirliyinin məlumatına görə, bu il sentyabrın 1-dən 2026-cı il mayın 31-dək Abşeron-Xızı, Qarabağ, Mil-Muğan, Mərkəzi Aran, Şirvan-Salyan və Şərqi Zəngəzur iqtisadi rayonlarında və Bakı şəhərində dəniz səviyyəsindən 150 metrdən yuxarı olmayan ərazilərdə salınacaq intensiv zeytun bağlarının hər hektarına görə fermerlərə 5,6 min manat dövlət dəstəyi veriləcək.
Bu subsidiya torpaq analiz nəticələrində torpağın elektrik keçiriciliyi göstəricisi 3,0 dS/m-dən az olan, minimum bir torpaq sahəsində (parseldə) və ya bir neçə torpaq sahəsindən (parseldən) ibarət vahid ərazidə ən azı 50 hektar sahədə salınan və 1 hektara minimum 1650 ədəd tingin əkildiyi intensiv zeytun bağlarına şamil edilir.
