Moderator.az saytına istinadən ain.az xəbər verir.
"ABŞ prezidentinin səyahəti milyonlarla dollarlıq təhlükəsizlik tədbirləri ilə müşayiət olunur..."
ABŞ prezidenti Donald Tramp növbəti dövlət səfəri ilə Böyük Britaniyaya gəlib. Onunla birlikdə yalnız ailə üzvləri deyil, həm də yüzlərlə təhlükəsizlik əməkdaşı, xüsusi texnika və prezidentin şəxsi nəqliyyatı ölkəyə daxil olub.
Moderator.az xəbər verir ki, bu barədə "bbc.com" nəşri yazıb.
Görünməz ordunun işi
Trampın təhlükəsizliyinin təminatı həm ABŞ, həm də Britaniya üçün milyonlarla dollara başa gəlir. Trampın səfərlərinə hazırlıq həftələrlə əvvəl başlayır. ABŞ-ın Gizli Xidməti və Britaniya polisi birlikdə mümkün təhlükələri hesablayır, hava məkanını bağlayır, şəhər küçələrini nəzarətə götürür. 2019-cu ildəki səfərində Londonda 6 mindən çox polis əməkdaşı səfər üçün səfərbər edilib və bu, 4, 6 milyon dollara başa gəlib. İndi isə tədbirlər daha da sərtləşdirilib, çünki ötən il Trampa qarşı sui-qəsd cəhdi təhlükəsizlik mexanizmlərinə yeni yanaşma gətirib.
Səmada hərbi qala
Tramp Böyük Britaniyaya özünün məşhur "Air Force One" təyyarəsi ilə gəlib. Xaricdən adi sərnişin təyyarəsinə bənzəsə də, əslində bu, yüksək texnologiyalı hərbi aviasiya qalasıdır. "Boeing 747-200B" modeli radarlara qarşı elektron müdafiə sistemləri, raketləri azdırmaq üçün istilik tələləri, havada yanacaq doldurma imkanları ilə təchiz edilib. Təyyarənin içərisində prezidentin şəxsi kabineti, idman zalı, əməliyyat otağı olan tibb bloku, mətbuat və müşayiətçilər üçün ayrıca bölmələr mövcuddur.
Yerdə hərəkət edən bunker
Londona enən kimi prezident "Cadillac One" limuzininə keçir. Bu avtomobil sadəcə nəqliyyat vasitəsi deyil, "Zver" (Canavar) ləqəbini doğruldan hərəkət edən istehkamdır. 9 tonluq maşın gülləkeçirməz şüşələr, zirehli korpus, gözyaşardıcı qazla təchiz edilmiş qumbaraatanlar, gecə görmə kameraları, peyk rabitəsi və fövqəladə halda istifadə üçün prezidentin qan qrupuna uyğun qan ehtiyatı ilə təchiz olunub. Təhlükəsizlik üçün limuzinin iki eyni versiyası istifadə olunur ki, düşmən hansı maşında prezidentin olduğunu ayıra bilməsin.
Göydə və yerdə müşayiət
Trampın hərəkətləri yalnız yerdə deyil, havada da ciddi müşayiətlə gedir. ABŞ-ın "Marine One" helikopteri, həmçinin MV-22 "Osprey" konvertoplanları prezident karvanının tərkibinə daxildir. Onlar həm təhlükəsizlik qruplarını daşıyır, həm də potensial hücumlara qarşı havadan müdafiə təmin edirlər. "Osprey"-lərin gurultusu 2019-cu ildə London sakinləri üçün artıq tanış səsdir.
Dron təhlükəsinə xüsusi nəzarət
Trampa qarşı son sui-qəsd cəhdindən sonra Gizli Xidmət dron təhlükəsini ayrıca izləyir. Buna görə də Vindsor qəsri üzərində uçuş qadağaları tətbiq olunub. ABŞ və Britaniya hərbi təyyarələri isə prezidentin şərəfinə hava nümayişi keçirəcək.
Səfərin siyasi fonu
Tramp iki günlük səfərində Kral Karl III və kraliça Kamilla ilə Vindsor qəsrində görüşəcək, lakin ictimai tədbirlərdən yayınacaq. Eyni zamanda London və Vindsorda minlərlə insan Trampın siyasətinə etiraz üçün küçələrə çıxmağa hazırlaşır. Beləliklə, prezidentin hər addımı - göydə, yerdə və hətta gizli keçidlərdə tam məxfi koordinasiya ilə qorunur. Tramp üçün bu səfər sadəcə diplomatik görüş deyil, həm də təhlükəsizlik texnologiyalarının möhtəşəm nümayişinə çevrilib.
Sonrakı hadisələr barədə daha çox məlumat almaq üçün ain.az saytını izləyin.
