ABŞ Prezidenti Donald Trampın növbəti müddətdə səsvermə dəstəyi yeni minimum səviyyəyə düşüb.
KİV "The Economist/YouGov" sorğusunun nəticələrinə istinadən məlumat yayıb.
Trampın ümumi dəstək səviyyəsinin azalması qismən müstəqil seçicilər və Latın Amerikası mənşəli seçicilər arasında reytinqinin düşməsi və iqtisadiyyat, miqrasiya kimi əsas məsələlər üzrə zəif göstəricilərlə bağlıdır.
Analitiklər qeyd edirlər ki, bu tendensiya prezidentin əsas Respublikaçı baza xaricində seçicilər arasında davamlı qütbləşmə və narazılığı vurğulayır.
Çərşənbə günü dərc olunmuş sorğuda Trampın dəstək reytinqi 39%, etiraz reytinqi isə 57% təşkil edib. Sorğu 12-15 sentyabr tarixlərində ABŞ-da 1567 yetkin vətəndaş arasında aparılıb və səhv payı 3,6% göstərilib.
39% reytinq Trampın ikinci müddətdə keçirilən "Economist/YouGov" həftəlik sorğuları arasında ən aşağı göstəricidir. 57% etiraz reytinqi isə ikinci müddət ərzində rekord yüksək göstəricidir.
Sorğu həmçinin göstərir ki, Trampın dəstək reytinqi iş yerləri və iqtisadiyyat, inflyasiya və qiymətlər, miqrasiya, vətəndaş hüquqları, cinayətkarlıq və silah kimi əsas məsələlər üzrə də aşağıdır.
Ötən həftə aparılmış sorğuya görə prezidentin dəstək reytinqi 41%, etiraz reytinqi isə 54% təşkil edirdi.
Qeyd edək ki, bu, konservativ fəal Çarli Kirkın öldürülməsindən sonra Trampın fəaliyyətinə dair ictimai rəyin ölçüldüyü ilk sorğudur.
