Danimarka baş naziri Mette Frederiksen bildirib ki, ölkə Rusiyanın Avropa üçün yaratdığı təhlükəyə qarşı hərbi büdcəsini artıraraq uzaqmənzilli dəqiq silahlar əldə edəcək.
QHT.az xəbər verir ki, Baş nazir Rusiyanın yaxın illərdə təhlükə yaradacağına əmin olduğunu qeyd edib, lakin Danimarkaya dərhal hücum riski olmadığını vurğulayıb. Müdafiə naziri Troels Lund Poulsen bildirib ki, alışa düşmən ərazisindəki hədəfləri vura bilən raketlər və dronlar daxil ola bilər. Hökumət xərclərin dəqiq məbləğini və silahların növlərini açıqlamayıb.
Keçən həftə NATO üzvü Danimarka hava hücumundan müdafiə sistemlərinə 58 milyard kron (9,2 milyard dollar) xərcləyəcəyini açıqlayıb ki, bu da ölkənin indiyədək ən böyük silah alışıdır.
R.İmanov
