BMT baş katibi Təhlükəsizlik Şurasında “1945-ci ilin reallıqlarını” aradan qaldırmağa çağırdı
Poliqon xəbər verir ki, BMT-nin baş katibi Antoniu Quterreş Təhlükəsizlik Şurasının mövcud tərkibinin müasir dünyanı əks etdirmədiyini və hələ də “1945-ci ilin reallıqlarını” özündə saxladığını bəyan edib. Onun sözlərinə görə, bu vəziyyət həm legitimlik, həm də effektivlik baxımından ciddi problemlər yaradır.
Quterreş bildirib ki, Təhlükəsizlik Şurasında veto hüququnun məhdudlaşdırılması xüsusilə kütləvi insan hüquqları pozuntuları hallarında zəruri addım ola bilər. Baş katib vurğulayıb ki, o, Şuranın islahatı barədə daim danışan və bu mövzunu davamlı gündəmdə saxlayan ilk BMT baş katibidir.
Onun sözlərinə görə, islahat məsələsində müəyyən irəliləyişlər mövcuddur. Bir sıra dövlətlər, o cümlədən daimi üzvlərdən bəziləri artıq Afrikanın Şurada daimi təmsilçiliyini dəstəklədiklərini bildiriblər. Bununla belə, yekun qərar yalnız BMT üzv dövlətləri tərəfindən qəbul oluna bilər.
Xatırladaq ki, bundan əvvəl Rusiya prezidenti Vladimir Putin “Sinyxua” agentliyinə müsahibəsində Moskva və Pekinin BMT-də islahatları dəstəklədiyini, xüsusilə Asiya, Afrika və Latın Amerikasının Təhlükəsizlik Şurasında təmsilçiliyinin artırılmasının vacibliyini qeyd etmişdi. Rusiya xarici işlər naziri Sergey Lavrov da dəfələrlə Şurada yerlərin bölgüsünün ədalətsiz olduğunu və Qərbin maraqları naminə qeyri-bərabər paylandığını vurğulayıb.
Ekspertlərin fikrincə, BMT Təhlükəsizlik Şurasında dəyişikliklərin aparılması qlobal güc balansına təsir göstərə və beynəlxalq münasibətlərdə yeni mərhələnin başlanğıcı ola bilər.
Poliqon.info
