Yaponiya Maliyyə Naziri Katsunobu Kato bildirib ki, üçüncü ölkələrin Rusiya nefti alışı səbəbindən sanksiyalara məruz qalması çətin olacaq.
“Yalnız Rusiya nefti aldıqları üçün yüksək gömrük rüsumlarının tətbiqi çətin olardı”, – deyə nazir jurnalistlərin ABŞ Prezidenti Donald Trampın Çin və Hindistana idxal rüsumlarını artırmaq çağırışına münasibətini soruşarkən bildirib.
Tramp sentyabrın 15-də ABŞ-ın Rusiyaya qarşı sanksiyalara hazır olduğunu açıqlayıb, amma bunun üçün əvvəlcə Avropanın belə addım atması vacib olduğunu vurğulayıb. Onun sözlərinə görə, Vaşinqton Moskva ilə tam şəkildə mübarizə apararkən, Avropa ölkələri Rusiya neftini almağa davam edə bilməz.
ABŞ prezidenti həmçinin NATO ölkələrinin hamısının Rusiya nefti alışını dayandırmasını və Çin məhsullarına 50-100% gömrük rüsumu tətbiq etməsini sanksiyaların bir şərti kimi qeyd edib. Tramp hesab edir ki, bu tədbirlər Ukrayna böhranının həllinə kömək edəcək və daha sonra rüsumlar ləğv oluna bilər.
