Bakı, 16 sentyabr, AZƏRTAC
2027-ci ilə qədər Estoniya-Rusiya sərhədində tank əleyhinə xəndək qazılmalı və 600-ə yaxın bunker inşa edilməlidir. Müdafiə strukturları sərhədin 100 kilometrlik hissəsində tikiləcək.
AZƏRTAC xəbər verir ki, ERR milli televiziya kanalının məlumatına görə, Estoniya-Rusiya sərhədində müdafiə strukturlarının tikintisinə başlanılıb. Estoniya hakimiyyət orqanlarının istehkam xəttinin tikintisinə başlamağa hazırlaşması niyyəti aprel ayında bildirilmişdi.
Televiziya kanalının məlumatına görə, Setomaa kilsəsinin cənub-şərqindəki Vinski kəndində hasardan kənarda yarım kilometrlik tank əleyhinə xəndək qazılıb. 2027-ci ilə qədər burada təxminən 40 kilometr uzunluğunda daha bir xəndək qazılması planlaşdırılır.
Estoniyanın şərq sərhədindəki müdafiə xəttinin uzunluğu 100 kilometr, eni isə 40 kilometr olmalıdır.
Avqust ayında Estoniyanı Rusiyanın İvanqorodu ilə birləşdirən Narvadakı “Dostluq” körpüsündə nəhəng metal qapılar peyda olub və bu, icazəsiz girişin qarşısını almaq üçün yeni təhlükəsizlik sisteminin ilk elementinə çevrilib.
