“Bizdə bir çox adamlar hansısa xarici universitetə gedəndə, əslində, səhv yerə getdiyini bilir, amma yolundan dönmür”.
Bu fikirləri elm və təhsil naziri Emin Əmrullayev yeni tədris ili ilə bağlı keçirilən media brifinqində jurnalistlərin suallarını cavablandırarkən bildirib. Nazir xüsusilə xaricdə təhsillə bağlı mövcud problemlərə, diplomların tanınması məsələsinə və ictimai qınağın zəifliyinə diqqət çəkib.
Nazir qeyd edib ki, bəzən xaricdə təhsil alan tələbə həmin ölkənin dilini belə bilmir, amma buna baxmayaraq diplomunun Azərbaycanda tanınmasını tələb edir. “Belə hallarda biz diplomu tanımadıqda narazılıqlar yaranır. Amma bizim işimiz heç kimin qanunsuz aldığı diplomu tanımaq deyil”, – o vurğulayıb.
Əmrullayevin sözlərinə görə, təhsil sistemi üçün ən böyük problemlərdən biri məhz xarici ölkələrdə keyfiyyətsiz və şübhəli yolla əldə olunan diplomların ölkəyə gətirilməsi və onların leqallaşdırılması cəhdləridir.
Nazir xüsusi olaraq ictimai məsuliyyət məsələsini önə çəkib. Onun fikrincə, Azərbaycanda qeyri-qanuni diplom alanlara qarşı kifayət qədər sərt münasibət yoxdur:
“Qeyri-qanuni diplom alanlara ictimai qınaq lazımdır. Təəssüf ki, Azərbaycanda bu yoxdur. Əksinə, qeyri-qanuni diplom almaq bəzən fərasət, bacarıq kimi qiymətləndirilir. Bu isə tamamilə yanlış yanaşmadır”.
Elm və Təhsil Nazirliyi dəfələrlə bildirib ki, beynəlxalq standartlara uyğun gəlməyən, təhsil prosesi real olmayan və ya saxta yolla əldə edilən diplomların tanınmasına imkan verilməyəcək. Əmrullayev də bu mövqeyi bir daha təsdiqləyərək əlavə edib ki, əsas məqsəd ölkədə təhsilin keyfiyyətini qorumaq və gələcəkdə peşəkar kadr hazırlığını təmin etməkdir.
Məsələ ilə bağlı ekspertlər hesab edirlər ki, ictimai qınağın olmaması saxta diplom problemini daha da dərinləşdirir. Əgər cəmiyyət bu hallara qarşı sərt mövqe sərgiləsə, qeyri-qanuni yollarla diplom əldə etməyə cəhd edənlərin sayı da azalacaq.
Eyni zamanda, təhsil siyasətçiləri bildirirlər ki, bu sahədə maarifləndirmə işləri artırılmalı, gənclər yalnız keyfiyyətli və beynəlxalq akkreditasiyadan keçmiş universitetlərdə təhsil almağa təşviq olunmalıdır.
