Musavat.com xəbər verir ki, sentyabrın 9-da İsrailin Qətərin paytaxtı Dohada HƏMAS rəhbərliyinə qarşı keçirdiyi hücum Yaxın Şərqdə diplomatik münasibətləri silkələyib. Bu, tarixdə ilk dəfə Körfəz ölkələrindən birində həyata keçirilən İsrail zərbəsi kimi yadda qaldı.
Məlumata görə, İsrail ordusu Dohadakı Leqtaifiya bölgəsində HƏMAS-ın siyasi liderlərini hədəf alıb. Zərbə nəticəsində altı nəfər, o cümlədən HƏMAS-ın Qətərdəki rəhbəri Xəlil əl-Həyyanın oğlu, onun ofis direktoru, üç mühafizəçi və bir qətərli təhlükəsizlik əməkdaşı həlak olub. Lakin hədəfdə olan əsas fiqurlar – Xalid Məşəl, Zaher Cəbarin və başqaları sağ qalıb.
Hadisə beynəlxalq miqyasda böyük rezonans doğurub. The Washington Post yazır ki, Qətər rəsmiləri bu zərbəni “xəyanət” kimi qiymətləndirib. Çünki ABŞ və İsrail əvvəllər Qətərə HƏMAS liderlərinin onun ərazisində vurulmayacağına dair birbaşa təminat vermişdi. ABŞ tərəfi Qətəri əməliyyatdan yalnız 10 dəqiqə əvvəl xəbərdar edib, bu isə Dohada ciddi narazılıq doğurub.
Qətərin xarici işlər naziri Məhəmməd bin Əbdürrəhman əl-Tani bildirib ki, bu, ölkəsinin suverenliyinə açıq hücumdur və vasitəçilik missiyasını sarsıtmaq cəhdidir. Qətərin baş naziri isə bəyan edib ki, heç bir hücum Dohanın regional diplomatik vasitəçi rolunu dayandırmayacaq.
Beynəlxalq aləmdən sərt reaksiyalar gəlib. Türkiyə, Azərbaycan, Almaniya, Böyük Britaniya, Rusiya, İran, BMT və Avropa İttifaqı Dohaya edilən zərbəni beynəlxalq hüququn kobud şəkildə pozulması və dövlət suverenliyinin tapdanması kimi qiymətləndiriblər. Almaniya hökuməti bunu “tamamilə qəbuledilməz” adlandırıb. Böyük Britaniyanın baş naziri Kir Starmer İsrailin hücumunu pisləyib və Londonun əvvəlcədən məlumatlı olmadığına dair açıqlama verib.
Ekspertlərin fikrincə, İsrailin bu addımı sadəcə HƏMAS-a zərbə deyil, həm də NATO və ABŞ müttəfiqi olan Qətərin sınağa çəkilməsidir. Bu, həm Vaşinqton-Doha, həm də Tel-Əviv-Doha münasibətlərində ciddi etimad böhranı yaradıb. Qətərin vasitəçilik missiyasına uzun müddətdir etibar edilirdi, indi isə bu etibar sual altına düşüb.
Nəticədə Dohada baş verənlər sadəcə hərbi əməliyyat deyil, həm də diplomatik inamsızlığın açıq təzahürü oldu. İsrailin verdiyi mesaj aydındır: HƏMAS-ın liderləri harada olursa-olsun, hədəf ola bilərlər. Qətərin cavabı isə bir o qədər qəti oldu: ölkə öz vasitəçilik rolunu davam etdirəcək, lakin bundan sonra ABŞ və İsrailə qarşı inamın bərpası çox çətin olacaq.
Musavat.com
