Nepalda sosial mediaya qoyulan qadağa gənclərin kütləvi etirazları ilə nəticələnib və ölkəni dərin siyasi böhrana sürükləyib. Sentyabrın 4-də hökumətin Facebook, X (Twitter), YouTube, WhatsApp və digər platformaları bağlaması “Gen-Z” adlanan gənc nəslin küçələrə çıxmasına səbəb olub.
Sentyabrın 8-dən başlayan etirazlar sürətlə genişlənib, korrupsiyaya və siyasi elitaya qarşı illərdir yığılan narazılıq sosial media yasağı ilə birlikdə alova dönüb. Aksiyalar zamanı dövlət binaları, parlament və hətta prezidentin iqamətgahı yandırılıb. Şiddətli qarşıdurmalar nəticəsində 19 nəfər həlak olub, yüzlərlə insan yaralanıb.
Təzyiq qarşısında hökumət qadağanı ləğv etməyə məcbur qalıb, sosial şəbəkələr yenidən açılıb. Lakin hadisələrin kulminasiya nöqtəsi baş nazir K. P. Şarma Olini istefa verməyə vadar edib. Onun gedişi ilə ölkədə fövqəladə vəziyyət elan olunub, komendant saatı tətbiq edilib, ordunun küçələrdə patrulu gücləndirilib. Tribhuvan hava limanı isə müvəqqəti bağlanıb.
Ekspertlər bildirirlər ki, bu hadisələr təkcə sosial media azadlığı uğrunda mübarizə deyil, həm də Nepalda köhnə siyasi nizamla gənc nəsil arasında dərin uçurumun göstəricisidir. Beynəlxalq media yazır ki, ölkədə yaranan böhran regiona da təsir edə bilər. \\Musavat.com
