Akpa Akpro “Verona”da

Bu yay “Latsio”dan azad agent kimi ayrılmış mərkəz yarımmüdafiəçisi Jan-Daniel Akpa Apkro bundan sonra “Verona”da çıxış edəcək.

Arena.az xəbər verir ki, “Verona” 32 yaşlı futbolçunu heyətinə pulsuz qatıb. Tərəflər bir mövsümlük (2026-cı ilin 30 iyununadək) müqavilə bağlayıblar.

Jan-Daniel Akpa Akpro Fransanın “Tuluza” klubunun yetirməsidir. O, “Salernitana”da da oynadıqdan sonra 2020-ci ildə “Latsio”ya keçib. Paytaxt klubunun heyətində 55 oyun keçirmiş futbolçu burada 1 qol və 1 assistlə yadda qalıb.

Akpro “Latsio”da olarkən “Empoli” və “Montsa”ya icarəyə də verilib. O, son iki mövsümü məhz “Montsa”da keçirib.

Akpa 2014-cü ildə debüt etdiyi Kot-d’İvuar yığmasının heyətində 17 oyun keçirib, məhsuldar fəaliyyəti ilə diqqət çəkməyib.

“Transfermarkt” internet-portalı 32 yaşlı yarımmüdafiəçinin transfer dəyərini 500 min avro məbləğində qiymətləndirir.