Konqo Demokratik Respublikasının (KDR) Səhiyyə Nazirliyi Kasai vilayətinə bağlı Mveka bölgəsində Ebola epidemiyası elan edib.
Səhiyyə naziri Samuel Roqer Kamba paytaxt Kinşasada keçirdiyi mətbuat konfransında bildirib ki, indiyədək bölgədə 28 Ebola yoluxması aşkarlanıb. Onun sözlərinə görə, epidemiya nəticəsində 15 nəfər, o cümlədən 4 tibb işçisi həyatını itirib.
Kamba ölüm göstəricisinin 57 faiz olduğunu, rəqəmlərin hələlik müvəqqəti xarakter daşıdığını və araşdırmaların davam etdiyini vurğulayıb. Nazir əlavə edib ki, hökumət Xalq Sağlamlığı üzrə Fövqəladə Hallar Əməliyyat Mərkəzi vasitəsilə koordinasiya mexanizmi yaradıb.
Onun sözlərinə görə, bölgəyə təcili müdaxilə qrupları göndərilib, müşahidə gücləndirilib, izolyasiya prosedurları tətbiq olunub, dəfn mərasimləri isə insanların təhlükəsizliyi təmin ediləcək şəkildə yenidən tənzimlənib.
Digər tərəfdən, Kanadada yerləşən Sərhədsiz Həkimlər (MSF) təşkilatı X sosial şəbəkəsindəki paylaşımında epidemiya ilə mübarizə üçün bölgəyə komanda göndərildiyini açıqlayıb. MSF bəyan edib ki, milli qurumlarla və beynəlxalq səhiyyə tərəfdaşları ilə koordinasiyalı şəkildə fəaliyyət göstərirlər.
Ümumdünya Səhiyyə Təşkilatının (ÜST) baş direktoru Tedros Adhanom Qebreyesus KDR-dəki Ebola epidemiyası ilə bağlı “X” sosial şəbəkəsində paylaşım edib.
O, ölkədə yeni Ebola epidemiyasının təsdiqləndiyini vurğulayaraq, “Təəssüf ki, indiyədək aralarında 4 tibb işçisinin də olduğu 15 ölüm qeydə alınıb” deyib.
Qebreyesus əlavə edib ki, ÜST qrupları həkimlərin qorunması və xəstələrə tibbi yardım göstərilməsi üçün mütəxəssisləri və zəruri avadanlıqları bölgəyə yerləşdirib.
