Bakı, 4 sentyabr, AZƏRTAC
Boston Universitetinin tədqiqatçıları müəyyən ediblər ki, uzun illər təhsil almış insanlara Alsheymer xəstəliyi ilə bağlı diaqnoz qoyulduqdan sonra onların yaddaşları və düşünmə qabiliyyətləri daha sürətlə zəifləyir.
AZƏRTAC “MedicalXpress” portalına istinadla xəbər verir ki, Böyük Britaniya, Almaniya və Fransadan olan 1300-dən çox yaşlı xəstənin məlumatları təhlil edilib. Onların idrak qabiliyyəti 18-36 ay müddətində Mini-Psixi Dövlət İmtahanı ilə izlənib. Təhsili 12 ildən çox olanlarla az təhsillilər müqayisə edilib. Nəticəyə görə, yüksək təhsil xəstəliyin simptomlarını uzun müddət gizlədə bilər. Lakin xəstəlik ortaya çıxdıqdan sonra eniş daha sürətli olur.
Qeyd edək ki, alimlərin fikrincə, mobil telefonlar və geyiləbilən cihazlar vasitəsilə aparılan rəqəmsal testlər Alsheymerin erkən aşkarlanmasını daha asan və sərfəli edə bilər.
