Cənubi Qafqaz regionunun inkişafı, sabitliyin formalaşması və münasibətlərin normallaşması üçün sülh mühüm şərtdir. 2022-ci ildən ölkəmizin təşəbbüsü ilə başlanan sülh prosesində Azərbaycanın təqdim etdiyi şərtlər beynəlxalq hüquqa söykənməklə, mövcud həqiqətləri əks etdirməklə yanaşı, Ermənistanın özünü real dövlət olaraq təsdiqləməsi üçün yeni zəmin yaradır - burada yer alan müddəalar İrəvanın qlobal arenada suveren dövlət kimi yer tapması üçün şəraitin formalaşdırılması deməkdir. Prezident İlham Əliyev “Əl-Ərəbiyyə” televiziyasına müsahibəsində bu mövzu ilə ətraflı fikirlərini ifadə edib.
“İki sahil” xəbər verir ki, bu fikirləri Milli Məclisin deputatı Pərvin Kərimzadə deyib.
Deputat bildirib ki, avqustun 8-də Vaşinqtonda paraflanan sülh sazişi layihəsi Ermənistan üçün daha həyati əhəmiyyət daşıyır. Artıq ATƏT-in Minsk Qrupundan imtina edən İrəvan özünün konstitusiyasında dəyişiklik etməklə və Azərbaycanın ərazi bütövlüyünü şübhə altına alan müddəaları çıxarmaqla sülh istiqamətində vacib bir addım atmış olacaq. Təəssüfləndirici haldır ki, ötən müddət ərzində Ermənistan sülh məsələsini süni şəkildə uzadıb - bəzi məqamlarda isə hətta manipulyasiyaya əl atıb. Artıq fəaliyyət göstərməsi üçün heç bir ehtiyac qalmayan ATƏT-in Minsk Qrupundan imtina edilib. Amma hələ də konstitusiya dəyişikliyi ilə bağlı real addım atılmayıb. Düzdür, İrəvanın siyasi hakimiyyəti bununla bağlı zaman-zaman açıqlamalar versə də, ümidverici ifadələr işlətsə də, real hər hansı bir iş ortaya qoyulmayıb. Prezident İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində prosesə heç bir müdaxilə olmayacağına ümid etdiyini bildirib: “Lakin yenə də məndə yüz faiz zəmanət yoxdur, çünki Ermənistanın daxili siyasəti barədə tam məlumatlı deyiləm. Bilirik ki, gələn yay Ermənistanda parlament seçkiləri keçiriləcək. Həmçinin bilirik ki, onlar yeni konstitusiya layihəsi üzərində işləyirlər. Lakin güclü xarici müdaxilə olarsa, bəli, bu, razılaşmaları poza bilər”.
Millət vəkilinin sözlərinə görə, razılaşmaların pozulması ilk növbədə Ermənistanın ziyanınadır. Çünki işğal siyasəti səbəbindən bütün regional layihələrdən təcrid olunan Ermənistanın Vətən müharibəsində ordusu da darmadağın edilib. Vaşinqton razılaşmasından imtina İrəvanı beynəlxalq ictimaiyyətin qınaq obyektinə də çevirəcək. Ona görə də, bu ölkədə hakimiyyətdə kimin olmasından asılı olmayaraq, razılaşmalara əməl edilməlidir.
Pərvin Kərimzadə qeyd edib ki, dövlətimizin başçısı müsahibədə Zəngəzur dəhlizinin əhəmiyyətini də xüsusi vurğulayıb. Azərbaycanın şərti ondan ibarətdir ki, Naxçıvana gediş-gəliş maneəsiz olmalıdır. Vaşinqton razılaşmasında bu məqam əksini tapıb. Digər tərəfdən, bunun üçün beynəlxalq təhlükəsizlik təminatı da olmalıdır. Zəngəzur dəhlizinin açılması bütövlükdə regionun sülh və əməkdaşlıq məkanına çevrilməsində mühüm rol oynayacaq.
“Ümumiyyətlə, Prezident İlham Əliyevin müsahibəsində yer alan fikirlər həqiqətən, Azərbaycanın beynəlxalq səviyyədə güclü və nüfuzlu dövlətə çevrildiyini təsdiqləyir. Bütün bunlar qürurvericidir”, - deyə deputat vurğulayıb.
