Tailandın Konstitusiya Məhkəməsinin qərarına istinadən Tailandın Baş naziri Phethonqthan Çinavat barəsində aparılan etik araşdırmadan sonra o, vəzifəsindən kənarlaşdırılıb. Məhkəmə iyulun 1-də yekun hökm çıxarılana qədər Şinavatranın səlahiyyətlərini dayandırmışdı. Bu barədə Sinqapurda çıxan “The Straits Times” gündəlik ingilisdilli qəzet xəbər verir.
Bildirilir ki, istintaqa iyunun 15-də Çinavat ilə Kamboca Senatının sədri Hun Sen arasında telefon danışığının sızması səbəb olub. Qəzet qeyd edir ki, “söhbətdə Tailandın Baş naziri Hun Senə “əmi” deyə müraciət edərək, ondan iki ölkə arasındakı sərhəddəki münaqişəni həll etməsini xahiş edib, həmçinin Tailand ordusunun silahlı qüvvələrini tənqid edib”.
Daha sonra Çinavat bu sözlərə görə üzr istəyib və Hun Seni söhbəti sızdırmaqda günahlandırıb.
Tailand və Kamboca arasında ərazi münaqişəsi mayın 28-də hər iki ölkənin öz ərazisi olduğunu iddia etdiyi ərazidə bir kambocalı əsgərin toqquşmada həlak olması ilə daha da şiddətlənib.
İyulun 24-də səhər saatlarında Tailand və Kamboca sərhədində silahlı toqquşmalar baş verib.
İyulun 28-də Malayziyanın Baş naziri Ənvər İbrahim Tailand və Kambocanın atəşkəs barədə razılığa gəldiyini açıqlayıb. Bu addım Kuala-Lumpurda ABŞ və Çin nümayəndələrinin də iştirak etdiyi ölkələr arasında danışıqlardan sonra atılıb.
Avqustun 7-də Tailand və Kamboca nümayəndələri Malayziyada keçirilən görüşdə iyulun 28-də qüvvəyə minmiş atəşkəs sazişinin gələcək həyata keçirilməsi üçün 13 bənd üzrə razılığa gəliblər.
Rizvan CƏFƏROV,
“Azərbaycan”
