Hurriyyet portalından verilən məlumata əsasən, ain.az bildirir.
“Bank of Baku” iki il əvvəl dəm qazından boğularaq dünyasını dəyişən Vətən müharibəsi veteranı Səbuhi Məmmədovun kredit borcuna görə məhkəməyə müraciət edib.
Bu barədə mərhum qazinin qohumları bildirib. Qeyd edilib ki, ailəsi onun vəfatından bir müddət sonra bankdan kredit götürdüyünü və təxminən, 1000-1200 manat borcu qaldığını öyrənib. Məlumata görə, işə sentyabrın 1-də Şirvan Şəhər Məhkəməsində hakim Əli İmanovun sədrliyi ilə baxılacaq.
Məsələ ilə bağlı “Bank of Baku”nun PR üzrə aparıcı eksperti Vüsalə Həsrətli Yenisabah.az-a bildirib ki, hazırda məsələ araşdırılır:
“Mətbuatda bu mövzuda dərc olunan xəbərləri görmüşük. Hazırda bu məsələni araşdırırıq. Dəqiqləşdirildikdən sonra daha ətraflı məlumat veriləcək”.
Qeyd edək ki, 44 günlük Vətən müharibəsində iştirak edən Səbuhi Məmmədov Prezident İlham Əliyevin imzaladığı sərəncamla “Xocavəndin azad olunmasına görə” medalı ilə təltif edilib.
O, həmçinin Səfərbərlik və Hərbi Xidmətə Çağırış üzrə Dövlət Xidməti tərəfindən “Hərbi vətənpərvərlik tərbiyəsində xidmətlərə görə” medalı, Əmək və Əhalinin Sosial Müdafiəsi Nazirliyi tərəfindən “Təşəkkürnamə” ilə təltif edilib. Səbuhi Məmmədov dünyasını dəyişənə qədər “Report” İnformasiya Agentliyində montajçı vəzifəsində çalışıb.
Sonrakı hadisələr barədə daha çox məlumat almaq üçün ain.az saytını izləyin.
