Bizimyol portalından əldə olunan məlumata əsasən, ain.az xəbər verir.
Paytaxtın “Bayırşəhər” adlanan ərazisində - “Təzəpir” məscidinin ətrafında başlanan söküntülərlə əlaqədar ziyalı kəsim, o cümlədən memarlar da narahatlıqlarını bildirirlər. Onlar bir müddətdir imzatoplama kampaniyasına başlayıb, müxtəlif dövlət orqanlarına məktublar göndərirlər.
Bizimyol.info xəbər verir ki, memarlar hesab edir ki, “Bayırşəhər”in sökülməsi Bakının tarixinə, ruhuna ziddir. Onlar hesab edir ki, Bakı Şəhər İcra Hakimiyyəti söküntü barədə sərəncam verməmişdən əvvəl bu barədə mütləq ictimai müzakirələr aparılmalı idi.
Bir müddətdir ki, həmin ərazidəki söküntülərlə əlaqədar “Bakı üçün imzala” həştəqi ilə kampaniya başladılıb. “Bakının tarixini birlikdə qoruyaq!” başlığı ilə açılmış petisiya səhifəsinə söküntüyə etiraz edən xeyli adam qoşulub.
“Bakı şəhərinin qədim və özünəməxsus məhəllələrindən biri olan Bayırşəhər — xüsusilə Təzəpir məscidinin ətrafında yerləşən küçələr — bu gün ciddi sökülmə təhlükəsi altındadır. Biz, bu şəhərin memarlıq və tarixi irsinə dəyər verən vətəndaşlar olaraq, bunun qarşısının alınmasını vacib sayırıq.
Bu məhəllələr təkcə fərdi evlər deyil — Bakının yaddaşı, koloritidir. Onların qorunması şəhərin mədəni irsi, turizm potensialı və gələcək nəslə ötürəcəyimiz dəyərlərlə birbaşa bağlıdır”, - petisiyada deyilir.
Etirazlara baxmayaraq, ərazidə söküntü prosesi davam etdirilir. Söküntü paytaxtın Süleyman Tağızadə, Mirzə Fətəli Axundov, Tolstoy, Murtuza Muxtarov, Əlövsət Quliyev, Nizami, Həzi Aslanov, Vidadi, Bəşir Səfəroğlu, Çingiz Mustafayev küçələrini əhatə edir. Bu ərazidə yaşayan sakinlərə hələ ötən ilin sonunda evlərinin söküləcəyi barədə xəbərdarlıq edilib.
Memar Abdul Hüseynov deyir ki, söküntü ərazisində Rastropoviçlərin, Cəlil Məmmədquluzadənin ev muzeyi də daxil olmaqla, çoxsaylı tarixi-mədəni əhəmiyyətli bina var.
Bakının baş planında “Bayırşəhər” ərazisi “Xüsusi mühafizə zonası” kimi qeyd olunub.
Memar Dilqəm İsmayılov da “Bayırşəhər”in söküntüsünə etiraz edənlərdəndir. O vurğulayır ki, bu ərazinin sökülməsi paytaxtın baş planına ziddir.
“Bakı yalnız binalardan ibarət deyil. Bu şəhərin yaddaşı var, küçələrinin qoxusunda, məhəllələrinin sükutunda, divarlarının kölgəsində. Bayırşəhərin bir hissəsi olan bu məhəllələr, İçərişəhərin ətrafında olan, yüz ildən çox tarixi olan onunla birlikdə böyüyən ruhudur.
İndi isə bu məhəllələrin sökülməsi gündəmdədir. Amma sökülən yalnız daş divarlar olmayacaq, sökülən Bakı insanının yaddaşı, şəhərə olan sevgisi, gələcək nəsillərin kimliyidir.
Bizim səsimiz, etirazımız, sevgimiz bu şəhərin qorunması üçündür. Çünki Bakı yalnız bugünün deyil, sabahın da evidir”.
Aytən, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
