Ukrayna Prezidenti Volodimir Zelenski türkiyəli həmkarı Rəcəb Tayyib Ərdoğanla Azərbaycan səfirliyinin binasını və "Bayraktar" zavodunun vurulmasını müzakirə edib.
Ukrayna tərəfinin Ərdoğanla diplomatik addımları müzakirə etməsi Ankaranın vasitəçi rolunu gücləndirə bilərmi? Zelenskinin Ərdoğana Ukraynaya və xalqımıza göstərdiyiniz dəstəyə, həqiqi sülhün əldə olunmasına kömək etməyə daim hazır olduğunuza və öhdəliyinizə görə təşəkkür edirəm deməsi Rusiyaya hərhansı siyasi mesaj ola bilər?
Mövzu ilə bağlı Redaktor.az-a açıqlamasında Milli Məclisin deputatı Hikmət Babaoğlu bildirdi ki, Rusiya-Ukrayna müharibəsi artıq heç bir müharibə çərçivəsinə sığmır.
"Tarix boyu müxtəlif müharibələr olub, hətta vətən müharibəsi, vətəndaş müharibəsi və işğalçılıq müharibəsi kimi təsnifatlar siyasi elm tərəfindən analiz edilib. Lakin Rusiya-Ukrayna müharibəsi nə müharibə hüququna, nə müharibələrin təsnifatına, nə qonşuluq və beynəlxalq əlaqələrə, nə də müharibə aparmaq hüququna uyğun gəlməyən eybəcər qlobal təzahürdür. Ümumi müharibə zamanı fərqli məsələlər ortaya çıxır. Avropa İttifaqına üzv ölkələrin səfirlikləri hədəf alınır, müxtəlif ölkələrin enerji obyektləri isə hədəfə çevrilir. Yəni müharibə zamanı hərbi hədəf olmayan məntəqələr Rusiya tərəfindən hərbi hədəf kimi seçilir. Son günlər Türkiyəyə məxsus sənaye müəssisəsinin hədəf seçilməsi təsadüfi deyil".
Deputat əlavə etdi ki, Türkiyə Rusiya-Ukrayna müharibəsi başlayandan daima ədalətli və beynəlxalq hüquqa uyğun mövqe tutub, heç bir tərəflə diplomatik əlaqələrini kəsməyib.
"Bu səbəbdən ona məxsus müəssisələrin hədəf seçilməsi haqsızdır. Azərbaycan da hər zaman humanist və beynəlxalq hüquqa uyğun mövqedən çıxış edib. Zelenski ilə Ərdoğan arasında baş tutan telefon danışığı Türkiyənin vasitəçi kimi yenidən rol almasına şərait yarada bilər. Ukrayna və Rusiya bilir ki, vaxtilə İstanbulda əldə edilmiş razılaşma yerinə yetirilmiş olsaydı, bu gün Rusiya-Ukrayna müharibəsi bu qədər genişmiqyaslı olmazdı. O zaman şərtlər Ukrayna üçün indiki qədər ağır deyildi və Rusiyanın işğalı bu qədər yayılmamışdı. Çox təəssüf ki, bu mərhələ arxada qaldı. Hər keçən gün sülhün vacibliyi bir daha görünür. Sülh təşəbbüsü ilə çıxış edən ən nüfuzlu ölkələrdən biri isə Türkiyədir", - deyə Hiknət Babaoğlu yekunlaşdırdı.
Xədicə BAXIŞLI
