ABŞ prezidenti Donald Tramp Ukrayna münaqişəsinin həllinə nail olarsa, Rusiyaya qarşı sanksiyaları “tezliklə” ləğv edə bilər.
Redaktor.az bu barədə ''Reuters''ə istinadən xəbər verir.
“Ukrayna ilə sülh danışıqları uğurlu olarsa, Tramp Moskva üçün stimul olaraq Rusiyaya qarşı bəzi sanksiyaları tez bir zamanda ləğv edə bilər”, - deyə nəşr yazıb.
Eyni zamanda qeyd edilib ki, “yalnız Avropa Rusiyada monetar böhranı əhəmiyyətli dərəcədə yumşaltmaq üçün daha genişmiqyaslı addımlar ata bilər”.
“Reuters”in məlumatına görə, Trampın variantları arasında Rusiyanın dondurulmuş aktivlərini “azad etmək”, ABŞ-nin Rusiya banklarına və korporasiyalarına kredit verməsini bərpa etmək və ABŞ-nin neft-mədən xidmətləri şirkətlərinə Rusiyanın neft və qaz yataqlarına qayıtmasına icazə vermək var.
Məqalədə deyilir ki, Trampın ata biləcəyi “ən böyük addım” Amerika neft-mədən xidmətləri şirkətlərinin Rusiyada fəaliyyətini məhdudlaşdıran ABŞ Xəzinədarlıq Departamentinin sanksiyalarını yumşaltmaq və potensial olaraq Rusiyaya qazılması çətin olan bəzi yerlərdə, o cümlədən Arktikada neft və qaz hasilatını artırmağa imkan verəcək.
Tramp bəyan edib ki, Ukraynadakı vəziyyətin sülh yolu ilə həllinə nail olmaq istəyir və buna görə də Rusiyaya qarşı “çox ciddi” iqtisadi sanksiyalar tətbiq etməyə tələsmir.
Aminə Şahsuvarqızı
