Bakı, 29 avqust, AZƏRTAC
Azərbaycanın Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti ilə Çexiyanın Milli CERT-i (CSIRT.CZ) arasında “Kibertəhlükəsizlik sahəsində məlumat mübadiləsi” mövzusunda ilk vörkşop sessiyası keçirilib.
AZƏRTAC Elektron Təhlükəsizlik Xidmətinin yaydığı məlumata istinadla xəbər verir ki, tədbirin əsas məqsədi qurumların kibertəhlükəsizlik sahəsində gördükləri işlərin, kiberhücumlara qarşı həyata keçirilən tədbirlərin müzakirəsi və qabaqcıl təcrübələrin paylaşılması olub.
Vörkşopda hər iki qurum öz fəaliyyət istiqamətləri və kibertəhlükəsizliyin təmin olunması istiqamətində həyata keçirdikləri tədbirlər barədə ətraflı təqdimatlar edib.
Tərəflər bilik və təcrübələrin davamlı şəkildə mübadiləsinin kibertəhlükəsizliyin gücləndirilməsində əsas rol oynadığını qeyd edərək, bu sahədə əməkdaşlığın davam etdirilməsinin və genişləndirilməsinin vacibliyini vurğulayıblar.
