Ötən gün Monakoda UEFA Çempionlar Liqasının əsas mərhələsinin püşkatma mərasimi keçirilib.
Publika.az xəbər verir ki, turnirdə iştirak edən 36 komandanın hamısı liqa mərhələsindəki rəqiblərini tanıyıb. Onlar arasında Azərbaycan çempionu "Qarabağ" da var.
Məhşur idman təhlil və statistika portalı "Opta" bu dəfə öz reytinq sistemi olan "Power Rankings" istifadə edərək iştirakçıların rəqiblərini çətinlik səviyyəsinə görə təhlil edib. İştirakçıların göstəricilərinə əsaslanaraq, kimin bəxtinin gətirdiyini, kimin isə çətin püşkə düşdüyü müəyyənləşdirib.
"Opta" əvvəlcədən qeyd edib ki, ötən mövsüm PSJ-nin şansını az qiymətləndirmişdilər. Parislilərin güclü rəqibləri var idi, amma bu, onların turniri qazanmasına mane olmayıb. Bu mövsüm də Fransa nəhənginin rəqibləri çətin hesab edilir. Luis Enrikenin komandası 92.7 əmsalla reytinqdə ikincidir. İlk sırada "Bayern" qərarlaşıb - 92.9.
Azərbaycan çempionu "Qarabağ" da püşkdə bəxti gətirməyənlər siyahısındadır. Ağdam klubu 91.2 reytinqlə 36 komanda arasında 12-ci sıradadır.
