Qaynarinfo saytından əldə olunan məlumata görə, ain.az məlumat yayır.
Ukrayna müdafiə qüvvələri tarixdə ilk dəfə olaraq hərbi gəmiyə FPV-dronlarla uğurlu zərbə endirib. 28 avqustda Azov dənizinin Temryuk körfəzində "Kalibr” qanadlı raketləri ilə təchiz olunmuş Rusiya korveti "Buyan-M” vurulub.
Qaynarinfo "Defense Express”ə istinadla xəbər verir ki, bu gün simvolik məna daşıyırdı: düz 73 il əvvəl, 28 avqust 1952-ci ildə dünyada FPV-dronların ilk döyüş tətbiqi baş vermişdi.
Hücumu Ukrayna Müdafiə Nazirliyinin Baş Kəşfiyyat İdarəsinin "Kabuslar” ("Prizraki”) adlı xüsusi bölməsi həyata keçirib. Onlar "Rubaka” və/və ya UJ-26 "Bober” tipli dronlardan istifadə edərək 350 kilometrdən çox məsafəni qət edib və hədəfə dəqiq zərbə endiriblər. Nəticədə gəminin bort hissəsi zədələnib, dəniz və hava hədəflərinin aşkarlanmasına cavabdeh olan MR-352 "Pozitiv” radiolokasiya stansiyası sıradan çıxıb. Bu stansiyasız gəmi faktiki olaraq "kor” qalıb.
Rusiyanın hava hücumundan müdafiə sistemlərinin acizliyi
"Buyan-M”in heyəti təhlükəni görsə də, aktiv manevrlər etsə də, gəminin hava hücumundan müdafiə sistemləri atəş açmayıb. Xüsusən də dronların, raketlərin və hətta təyyarələrin məhv edilməsi üçün nəzərdə tutulmuş yüksək sürətli AK-630M2 "Duet” artilleriya kompleksi işləməyib.
Səbəblər hələ məlum deyil: problem RLS-də, atəşə nəzarət sistemində və ya optik-nişangah kompleksində ola bilər. Amma fakt budur ki, gəminin əsas hava hücumundan müdafiə silahı Ukraynanın FPV-dronları qarşısında aciz qalıb.
Qara dəniz donanması üçün nəticələr
"Buyan-M” sinifli korvetlər RF-nin Qara dəniz və Xəzər donanmalarının əsas gəmilərindən sayılır. Bu birləşmələrdə azı yeddi belə gəmi var, daha dördü isə Baltik donanmasının tərkibindədir. Eyni tip hava hücumundan müdafiə sistemləri həm də "İvan Qren” və "Pyotr Morqunov” iri desant gəmilərində quraşdırılıb.
Bununla belə, "Buyan-M”in vurulması bütün bu sinif gəmilərin müasir Ukrayna dronları qarşısında zəif olduğunu göstərib.
"Buyan”a zərbə – nə məlumdur?
Xatırladaq ki, Azov dənizində işğal olunmuş Krıma yaxın ərazidə Rusiyanın 21631 layihəli "Buyan-M” kiçik raket gəmisi vurulub.
Bildirilib ki, Ukrayna Müdafiə Nazirliyinin Baş Kəşfiyyat İdarəsinin "Kabuslar” xüsusi bölməsi hava dronu zərbəsi ilə gəminin RLS-ni sıradan çıxarıb, Baş Kəşfiyyat İdarəsinin Aktiv Hərəkatlar Departamentinin xüsusi təyinatlıları isə "Kalibr” daşıyıcısının bortuna zərbə endirib.
"Militarnıy” yazır ki, bu, müharibə dövründə Ukrayna müdafiə qüvvələrinin zədələdiyi üçüncü belə tip gəmi olub.
Alpər
Sonrakı hadisələr barədə daha çox məlumat almaq üçün ain.az saytını izləyin.
