Yay başlayandan hər kəs harada istirahət edəcəyi barədə düşünür. Əvvəlki illərdə Qərb bölgəsinə səfər etmişdik. İndi Qubaya gedəcəyimizi planlaşdırdıq və respublikamızın bu dilbər güşəsinə yollandıq.
Doğrudan da, Qubanın təbiəti valehedicidir və istirahət mərkəzlərinin rəngarəng proqramları, ləzzətli təamların süfrə təqdimatı çox maraqlıdır. Qubada yay turizminin inkişafında havanın da rolu var. Orada qaldığımız bir həftə ərzində gündüz temperatur 30 dərəcədən artıq olmadı. Axşamların sərin mehi isə yayda ələ düşməyən hava idi.
Qubada turistlər üçün yaradılmayan və ya yaddan çıxan taksi xidmətidir. Tanıdığın sürücü yoxsa, harasa getməyin müşkülə çevrilir. Qəçrəş istiqamətində mərkəzlər bir-birinə yaxın məsafədə yerləşir və çox adam piyada gəzintiyə üstünlik verir. Amma Təngaltı istiqamətinə getmək istəsən, bu, əməlli-başlı problemdir. Bəzən saatlarla yol kənarında taksi gözləməli olursan.
İkinci problem Quba-Bakı istiqamətində marşrut avtobuslarıdır. Turistlərin bir çoxu şəxsi maşınlarından istifadə etsə də, müəyyən insanların buna imkanı yoxdur. Biz də avtobusla istirahət etməyi sevirik. Hansısa istirahət mərkəzinin qarşısında taksi axtarmaq şəxsi, rayon avtovağzalında saatlarla Bakı istiqamətində avtobus gözləmək isə ictimai məsələdir. Bəlkə də qış fəslində bu bölgəyə səfər edən insanların sayı az olduğu üçün avtobusların iki saatdan bir işləməsi normaldır. Amma yayda bu hərəkət cədvəli turizm mövsümünə uyğun nizamlanmalıdır, başqa sözlə, Qubaya, eləcə də digər turizm bölgələrinə gedən avtobusların sayı artırılmalıdır.
Nuranə MUSAYEVA,
Quba rayonu
