Astaralı Aysu Mustafazadə musiqi aləmində qazandığı uğurla dünyaya səs salıb. Aysu Astarada şəhər 2 saylı tam orta ümumtəhsil məktəbində oxuyub. Fitri istedadı, yaxşılardan görüb-götürmək qabiliyyəti, tərbiyəsi parlaq gələcəyə doğru onun həyat yoluna işıq saçıb.
Aysu Oqtay Kazımi adına Astara Uşaq Musiqi Məktəbində müəllimi Aybəniz Dadaşovanın rəhbərliyi altında 7 il ərzində sənətin incəliyini tam şəkildə mənimsəyib. Gələcəyin ən tanınmış pianoçusu olmaq məqsədilə orta ixtisas təhsilini Bakıda Bülbül adına Musiqi Məktəbində, ali təhsilini isə Üzeyir bəy Hacıbəyli adına Bakı Musiqi Akademiyasında alıb.
Hələ uşaq yaşından Cənubi Koreya mədəniyyətinə böyük maraq və məhəbbət göstərən Aysu Koreya dilini öyrənərək TOPIC1 (5-ci səviyyə) sertifikatı alıb və ciddi hazırlıqdan sonra Asiyanın ən nüfuzlu incəsənət ocağı sayılan - Korea National University of Arts universitetinə fortepiano ixtisası üzrə qəbul olub. O, Asiya ölkələri üzrə AMA+ tam təqaüdünü qazanan 21 tələbədən biri olmaqla yanaşı, bu uğuru əldə edən ilk azərbaycanlı musiqiçidir.
Zəfər ORUCOÜLU
