Politico: Rusiya və Ukrayna arasında mümkün sülh sazişi çərçivəsində bufer zona yaradılması gündəmdədir...
Poliqon xəbər verir ki, Avropa liderləri Rusiya və Ukrayna arasındakı cəbhə xəttində 40 kilometrlik bufer zona yaradılması imkanını nəzərdən keçirirlər. Politico-nun Avropa diplomatlarına istinadla yaydığı məlumata görə, bu məsələ sülh sazişinin mümkün şərtləri arasında müzakirə olunur.
Qəzet qeyd edir ki, bufer zonanın dərinliyi ilə bağlı avropalı rəsmilər arasında vahid mövqe yoxdur. Həmçinin, Ukraynanın belə bir variantı qəbul edib-etməyəcəyi də qeyri-müəyyəndir, çünki bu, müəyyən ərazi güzəştləri anlamına gələ bilər. ABŞ isə sözügedən müzakirələrdə iştirak etmir.
Məlumata görə, sərhədin patrul edilməsi üçün tələb olunan hərbi qüvvələrin sayı da açıq qalır. Rəsmilər 4 minlə 60 min arasında hərbçinin cəlb oluna biləcəyini bildirirlər. Lakin hələlik heç bir ölkə öhdəlik götürməyib. ABŞ prezidenti Donald Tramp isə Amerika qoşunlarının iştirakından imtina edib.
Poliqon.info
