“Qadın və Müasir Dünya” Sosial Xeyriyyə Mərkəzinin sədri Südabə Şirəliyeva Beynəlxalq Azərbaycan Məktəbi - TISA Alumni & Friends tərəfindən 28 avqust 2025-ci ildə təşkil olunan 5-ci illik İcma Təsir Yarmarkasında iştirak edib.
QHT.az xəbər verir ki, Mərkəzin sədri TİSA rəhbərliyinə və icmasına, eləcə də təşkilatçılara dəvət üçün təşəkkür edərək bildirib ki, bu tədbir çox həyəcanlı və dəyərli bir platforma oldu.
Mərkəzin fəaliyyəti barədə QHT.az-a məlumat verən Südabə Şirəliyeva qeyd edib ki, “İşıqlı Ev” Küçə Uşaqları Sosial-Psixoloji Reabilitasiya və İdman-Sağlamlıq Mərkəzi 2002-ci ilin iyun ayından Bakı şəhərində fəaliyyət göstərir. Bu müddət ərzində 5000-dən çox uşaq mərkəzdə qeydiyyatdan keçib:
"Hazırda hər gün 10-15 uşaq mərkəzə müraciət edir. Onlara isti yemək, geyim yardımı göstərilir, yazıb-oxumaq və şəkil çəkmək öyrədilir, həmçinin idmanla məşğul olmaq üçün şərait yaradılır. Yüzlərlə uşaq məktəbə qaytarılıb, çoxsaylı uşaqlar xəstəliklərdən müalicə edilib. Lakin müşahidələr göstərir ki, maddi imkanların məhdudluğu və ağır həyat şəraiti səbəbindən ən yoxsul uşaqlar hələ də ən çox təhlükə altında qalırlar. Bizim üçün sosial reabilitasiya uşaqları dəyərli əxlaq normalarına qaytarmaq və onların şəxsiyyət kimi tanınmasına yol açmaqdır. Mərkəz bütün çətinliklərə baxmayaraq küçə uşaqları üçün sığınacaq və dayaq yeri olub”.
Pərvanə Fərhadqızı
