Pekində keçiriləcək Qələbə Paradında Azərbaycan Prezidentinin iştirakı iki ölkə arasında münasibətlərə hansı əlavə siyasi mesaj verir?
"Bildiyiniz kimi, Prezident İlham Əliyevin Çinə səfəri oldu. Prezident səfər zamanı Çində yüksək səviyyədə qarşılandı. Çin Xalq Respublikasının rəhbərliyi tərəfindən böyük diqqət göstərildi və indi dəvət əsasında Çinə yenidən səfər edəcək".
Bu sözləri Olaylar.az-a açıqlamasında siyasi şərhçi Əhəd Məmmədli deyib. Siyasi şərhçi bildirib ki, həmin tədbirdə digər ölkə rəhbərləri ilə yanaşı Azərbaycanın da iştirakı nəzərdə tutulub. Bu, xüsusilə diqqət çəkir, çünki Azərbaycan 9 may tədbirlərində iştirak etməmişdi, amma burada iştirak edəcək: "Bu, bir göstəricidir və Azərbaycan-Çin münasibətlərini daha da yaxınlaşdıracaq, gücləndirəcək. Çin kimi bir tərəfdaşla əlaqələrin inkişaf etdirilməsi Azərbaycanın milli maraqlarına tam uyğun gəlir. Eyni zamanda, biz Çinə münasibətdə Uyğur türklərinin, müsəlmanlarının vəziyyətini də unutmamalıyıq. Təəssüf ki, bir çox müsəlman ölkələri bu məsələni unudurlar. Amma münasibətləri inkişaf etdirməklə yanaşı, bu humanitar məsələlər də gündəmdə saxlanmalıdır".
Ə. Məmmədli qeyd edib ki, Azərbaycan üçün Çinlə əlaqələrin genişlənməsi, eynilə Rusiya ilə münasibətlərdə olduğu kimi, böyük əhəmiyyət daşıyır. Çin dünyanın ən böyük ölkələrindən biridir, iqtisadiyyatına görə ikinci yeri tutur. Həmçinin dünya orduları arasında da aparıcı yerlərdən birinə malikdir. Belə bir ölkə ilə əlaqələrin dərinləşdirilməsi Azərbaycanın maraqlarına uyğundur. Çində keçirilən tədbirlər çərçivəsində müxtəlif dünya liderləri ilə təmasların baş tutacağı gözlənilir. Bu, Azərbaycan üçün də faydalı olacaq. Çünki bəzi dövlətlərlə münasibətlərdə gərginlik yaşansa da, digərləri ilə əlaqələr əksinə, yaxşılaşır. Belə beynəlxalq tədbirlər bu mənzərəni müşahidə etmək və yeni imkanlar əldə etmək baxımından önəmlidir.
Siyasi şərhçinin sözlərinə görə, Çin həm də İkinci Dünya müharibəsinin qaliblərindən biri olduğunu göstərmək istəyir:
"Burada mübahisə mövcuddur: Rusiya özünü əsas qalib hesab edir, ABŞ və Avropa isə bildirirlər ki, onların ikinci cəbhəni açması olmadan qələbə mümkün olmazdı. Bu mübahisəyə indi Çin də qoşulur. Unutmayaq ki, İkinci Dünya müharibəsi zamanı ən çox zərər görən ölkələrdən biri də Çin idi. O dövrdə həm daxili müharibə davam edirdi, həm də Yaponiya ilə müharibə aparılırdı. Çox böyük itkilər verilmişdi. Buna görə də Çin özünü qələbə qazanan ölkələrdən biri hesab edir və bu iddiasını tarixi faktlarla əsaslandırmağa çalışır".
Sevda Dəniz
