Ses qazeti saytından alınan məlumata görə, ain.az bildirir.
2020-ci ilin payızında Azərbaycan tarixinə qızıl hərflərlə yazılan bir zəfər salnaməsi başladı. 27 sentyabr 2020-ci il tarixində Ermənistanın növbəti təxribatına cavab olaraq başlayan İkinci Qarabağ Müharibəsi 44 gün davam etdi və Azərbaycan ordusunun qətiyyəti, xalqımızın dəstəyi, dövlətimizin siyasi iradəsi nəticəsində 10 noyabr 2020-ci ildə Ermənistan kapitulyasiya aktını imzalamağa məcbur oldu. Bu qələbə təkcə hərbi qələbə deyil, həm də milli birliyin, siyasi liderliyin və xalq-dövlət birliyinin parlaq nümunəsidir. İkinci Qarabağ Müharibəsinin uğurla nəticələnməsinin əsas səbəblərindən biri Azərbaycan xalqı ilə dövlətinin "bir yumruq" kimi birləşməsi idi. 30 ilə yaxın davam edən işğal dövründə Azərbaycan cəmiyyəti heç zaman torpaqlarımızla vidalaşmadı. Hər bir azərbaycanlının qəlbində Qarabağ ağrısı vardı və hər kəs "bir gün qayıdacağıq" ümidi ilə yaşayırdı. Müharibə başlayan gündən Azərbaycan xalqı cəbhə bölgəsindəki hərbi əməliyyatlara tam dəstək verdi. Ön cəbhədə əsgərlərimiz düşmənə qarşı rəşadətlə döyüşdü, arxa cəbhədə isə xalqımız onlara mənəvi və maddi dəstəyini əsirgəmədi. Hər bir ailə, hər bir vətəndaş könüllü şəkildə ordumuza yardım etdi, dualarla, ianələrlə, könüllü fəaliyyətlə bu müqəddəs savaşa öz töhfəsini verdi. Müharibə zamanı Azərbaycan Respublikasının Prezidenti, Ali Baş Komandan İlham Əliyevin qətiyyətli liderliyi və düzgün hərbi-siyasi strategiyası qələbənin başlıca amillərindən biri oldu. Cəbhədə əldə olunan hər bir uğur, azad edilən hər bir kənd və şəhər Prezidentin dəmir iradəsi, hərbi rəhbərliklə sıx koordinasiyası və beynəlxalq informasiya meydanındakı fəallığı nəticəsində mümkün oldu. Prezident İlham Əliyevin döyüş günlərində xalqla mütəmadi olaraq informasiya paylaşması, beynəlxalq medianın önündə Azərbaycanın haqlı mövqeyini müdafiə etməsi, Ermənistanın işğalçılıq siyasətini ifşa etməsi dünya ictimaiyyətinin də diqqətini bu ədalətli mübarizəyə yönəltdi. Xalq öz Prezidentinin arxasında birləşdi və bu birlik düşmənə gücümüzü göstərdi. Azərbaycan Ordusu 44 günlük Vətən Müharibəsində müasir hərbi texnologiyalar və strateji planlama ilə dünyanın diqqətini çəkdi. Ordumuz yüksək peşəkarlıqla həyata keçirdiyi əməliyyatlar nəticəsində Ermənistan silahlı qüvvələrini tamamilə məğlub etdi. Xüsusi təyinatlı qüvvələrimiz, pilotsuz uçuş aparatlarımız (PUA-lar), artilleriya və piyadalar birlikdə sistemli şəkildə irəlilədilər. Şuşa əməliyyatı bu qələbənin zirvəsi oldu. Dağlıq relyefə və çətin hava şəraitinə baxmayaraq, Azərbaycan əsgərləri əlbəyaxa döyüşlərlə şəhəri azad etdilər. 8 noyabrda Şuşanın azad edilməsi ilə Ermənistanın ordusu və siyasi rəhbərliyi təslim olmağa məcbur oldu. 10 noyabr 2020-ci il tarixində Ermənistanın baş naziri Nikol Paşinyan, Rusiya prezidenti Vladimir Putin və Azərbaycan Prezidenti İlham Əliyev arasında üçtərəfli bəyanat imzalandı. Bu sənədlə Ermənistan faktiki olaraq məğlubiyyətini qəbul etdi və kapitulyasiya aktına imza atdı. Sənədə əsasən, Azərbaycanın daha azad etmədiyi rayonlar (Ağdam, Kəlbəcər, Laçın) Ermənistansız hərbi əməliyyat təzyiqi ilə sülh yolu ilə geri qaytarıldı. Bu sənəd Azərbaycanın beynəlxalq hüquq çərçivəsində tanınan ərazi bütövlüyünün tam bərpasının başlanğıcı oldu. Bu zəfər təkcə torpaqların azad olunması deyil, həm də ədalətin və haqqın təntənəsi idi. Azərbaycan xalqı uzun illərdir çəkdiyi ağrının, həsrətin əvəzini aldı. Şəhidlərimizin qanı yerdə qalmadı, məcburi köçkünlər öz ata-baba yurdlarına qayıtmaq ümidi ilə yaşamağa başladı. Qarabağ artıq sülhün, quruculuğun və inkişafın mərkəzinə çevrilməkdədir. Azad edilən ərazilərdə sürətlə aparılan bərpa və yenidənqurma işləri bu qələbənin davamlı olacağını göstərir. Azərbaycan xalqı və dövləti 2020-ci ilin 44 günündə öz tarixini yazdı. Bu tarixi zəfər bir daha sübut etdi ki, xalq və dövlət bir olduqda, heç bir düşmən bu birliyin qarşısında dura bilməz. Azərbaycan Ordusu öz gücünü sübut etdi, xalqımızın əzmi və birliyi isə bu gücə mənəvi dayaq oldu.
Tarix yazıldı və bu tarix gələcək nəsillərə vətənpərvərlik dərsi olaraq əbədi qalacaq.
Fənar Qənbərova
YAP Laçın rayon təşkilatının fəal üzvü
Laçın rayon Ədalət Məmmədov adına Zabux kənd orta məktibində müəllim
Hadisənin gedişatını izləmək üçün ain.az saytında ən son yeniliklərə baxın.
