Birinci mərhələdə Macarıstanın yerli komandası “Ferensvaroş”-la oyunda 3:1 hesabla qələbə qazanan “Qarabağ”-ın növbəti oyunu sabah baş tutacaq.
Növbəti oyunda vəziyyət necə olacaq? “Qarabağ”ın Çempionlar Liqasına çıxması gözlənilirmir?
Tanınmış şərhçi Ceyhun Rzayev Referans-a açıqlamasında bildirib ki, ilk oyunda iki top fərqlə əldə olunan üstünlük “Qarabağ”ı Çempionlar Liqasına çıxma ehtimalına çox yaxınlaşdırır:
“Az əvvəl mətbuat konfransında da Qurban Qurbanov və futbolçu Bəhlul Mustafazadə bildirdilər ki, sabahkı oyun birinci oyundan daha çətin keçəcək. Çünki ciddi oynamaq lazımdır. Təbii ki, birinci oyundan qazanılan qələbə - iki top üstünlükdür. Amma hələ bu o demək deyil ki, artıq “Qarabağ” məsələni həll edib, Çempionlar Liqasındadır. “Qarabağ”a inanırıq, bütün biletlər də tükənib. “Qarabağ” 8 illik fasilədən sonra tarixdə ikinci dəfə Çempionlar Liqasına düşəcək. Buna ölkə olaraq çox inanırıq”.
Şərhçi “Qarabağ”ın Çempionlar Liqasına düşdükdən sonra etməsi ehtimal olunan transferlərdən və “Qarabağ”ın gəlirlərindən də danışıb:
“Çempionlar Liqasına keçən “Qarabağ”da yeni transferlər də olacaq. Qrup rəhbəri Tahir Gözəl də bildirib ki, biz bu dəfə “Qarabağ” tarixinin ən böyük büdcəsini ayırmışıq. Bütün resurslar sərf olunub. “Qarabağ” Çempionlar Liqasına düşərsə, əsas mərhələdə 8 oyun olacaq. Keçən ilki praktika göstərdi ki, heyət mütləq geniş olmalıdır. Çempiomlar Liqasına keçid edən komandanın yüzdə yüz gəlirləri də artacaq və büdcəsi dolacaq. Çempionlar Liqasının əsas mərhələsinə düşmək çox böyük maliyyə vəsaitinin gələcəyi deməkdir”.
Futbol mütəxəssisi, tanınmış məşqçi Ağasəlim Mircavadov da “Qarabağ”ın sabahkı oyunu ilə bağlı fikirlərini bildirib:
“ “Qarabağ” çox işlər görüb. Bu, məlum məsələdir. Mən deməzdim ki, “Ferensvaroş” zəif klubdur. Ancaq bəzi nüanslar var ki, gərək həmin nöqtələrə növbəti oyunda daha da diqqət olunsun. Yəni hüsumda lazım olan epizodlar qol vəziyyəti düzəldilməlidir. “Qarabağ” da bunu bacardı. Amma hələ ki, iş bitməyib. Çünki işin mahiyyəti sabahkı oyundadır. Əsas məsələ budur ki, keçən oyunda olan pozisiya səhvləri bu oyunda olmamalıdır. Çünki onlar bəzi epizodlardan istifadə edə bilmədilər. Hesabı saxlamaq düşüncəsi oyunçularda olmamalıdır. Çünki bu düşüncə komanda üzvlərinə pis təsir edir. Ümumi olaraq isə düşünürəm ki, “Qarabağ” Çempionlar Liqasına keçə biləcək”.
Ağasəlim Mircavadov isə düşünür ki, “Qarabağ”ın hazırda oyunçu sayını artırmaq üçün tranferə ehtiyacı yoxdur. Bu sadəcə lazım olan hallarda vacibdir.
“Ötən gün mən “Qarabağ”ın bir hücumcu daha aldığını oxudum. Bəli, onlara bir hücumçu lazım idi. Çünki bir-birlərini əvəzləyə bilmək üçün bu vacibdir. Avropa Oyunların, Azərbaycan Çempionatı, Azərbaycan Kuboku və s. bu oyunlar ardıcıl olduğuna görə, komanda sıx qrafiklə oynayır və bu qrafiki bütün oyunçular özlərində hiss etməlidirlər. “Qarabağ” artıq istədiyi oyunçuları alıb, əlavə olaraq hücumçu lazım idi, onu da artıq təmin etdilər. Oyunçu almaq məsələsi klublar üçün daim gündəmdə olan məsələdir. Əsas məsələ lazım olan oyunçunu axtarıb tapmaqdır. Digər məsələ isə gələn oyunçuda inkişafın olmasıdır”.
Fidan Vəlisoy
