ABŞ Prezidenti Donald Tramp rəqəmsal xidmət vergisi tətbiq edən ölkələrə xəbərdarlıq edərək bildirib ki, əgər bu tətbiqlər ləğv edilməsə, həmin ölkələrə əlavə tariflər qoyulacaq və ABŞ-ın yüksək qorunan texnologiyalarının və çiplərinin ixracına məhdudiyyətlər tətbiq olunacaq.
Donald Tramp mövzu ilə bağlı sosial media hesabında paylaşım edib.
Prezident kimi Amerika texnologiya şirkətlərinə hücum edən ölkələrə qarşı dayanacağını vurğulayan Tramp rəqəmsal vergilər, rəqəmsal xidmət qanunvericiliyi və rəqəmsal bazar tənzimləmələrinin ABŞ texnologiyasına zərər vurmaq və ya ayrı-seçkilik məqsədilə hazırlandığını iddia edib.
Tramp əlavə edib ki, bu tətbiqlər Çinin ən böyük texnologiya şirkətləri üçün heç bir maneə yaratmır və bunun sona çatması vacibdir.
Tramp rəqəmsal vergilər, qanunvericilik, qaydalar və ya tənzimləmələr tətbiq edən bütün ölkələrə bu tətbiqləri aradan qaldırmadıqları təqdirdə ABŞ-a ixracına mühüm əlavə tariflər tətbiq edəcəyini və yüksək qorunan texnologiyalı çiplər üçün ixrac məhdudiyyətləri qoyacağını da bəyan edib. O qeyd edib ki, Amerika və Amerika texnologiya şirkətləri artıq dünyanın pul kisəsi və ya ayaqaltısı deyil: "Amerikaya və inanılmaz texnologiya şirkətlərimizə hörmət göstərin, əks halda nəticələrinə qatlanmağa hazır olun”.
