Rusiyada aparılan son təhlillər üzə çıxarıb ki, təxminən 13 milyon vətəndaş gizli milyonçudur və onların əksəriyyəti sərvətlərini “bankdan kənarda” gizlədir. Mütəxəssislər hesab edirlər ki, bu şəxslərin bəziləri keçmiş bürokratlar, digərləri isə öz qiymətli əmlaklarını sataraq külli miqdarda pul toplayan gizli varlı şəxslərdir. Lakin bu sərvət çox vaxt ictimaiyyətin nəzərindən gizli qalır, çünki onun sahibləri ya öz mənbələrini açıqlamaq istəmirlər, ya da birbaşa dövlət nəzarətindən yayınırlar.
Hafta.az-ın yazdığına görə, vurğulanan nümunələr olduqca təəccüblüdür: Samarada təqaüdçü bir qadının 421 milyon rublu fırıldaqçılar tərəfindən ələ keçirilib. Analoji olaraq, Moskvada yaşlı qadın 146 milyon rubl, təqaüdçü rəssam 5 milyon rubl, 73 yaşlı model nənə isə 63 milyon rubldan çox ziyana düşüb. Bu misallar təkcə ayrı-ayrı faciələri deyil, həm də ictimaiyyətdən gizlədilən nəhəng sərvətlərin varlığını ortaya qoyur. Mütəxəssislər qeyd edirlər ki, bu vəsaitlər yalnız saxtakarlıq zamanı aşkarlanır və adətən ən ciddi məxfilik şəraitində saxlanılır. Maliyyə ekspertlərinin fikrincə, bu gizli sərvətlərin mənbəyi həmişə qanunsuz olmur. Bəzi təqaüdçülər sovet dövründən qalan mənzillərini və ya qiymətli yay evlərini sataraq milyonlarla rubl qazana bilirlər. İllərlə dövlət vəzifələrində çalışanlar və ya özəl sektorun rəhbərləri də yüksək mükafatlar və investisiyalar hesabına xeyli qənaətə malikdirlər. Lakin bu şəxslərin bir çoxu ya sistemə inamsızlıqları, ya da qazanclarının qanuniliyindən narahat olduqları üçün pullarını banklarda saxlamaqdan yayınırlar.
Rusiya Mərkəzi Bankının məlumatına görə, banklardan kənarda saxlanılan nağd pulun ümumi həcmi 15-18 trilyon rubl arasında dəyişir. Bu rəqəm 2025-ci ilə qədər ölkənin federal büdcəsinin az qala yarısına bərabərdir.Mütəxəssislərin fikrincə, belə böyük məbləğin iqtisadi dövriyyəyə daxil edilməməsi potensialın əhəmiyyətli itkisini ifadə edir.
