Almaniyanın “Borussiya” (Dortmund) klubunun hücumameyilli yarımmüdafiəçisi Covanni Reyna Mönhenqladbax “Borussiya”sına keçib.
Arena.az bu barədə Mönhenqladbax klubunun rəsmi saytına istinadən xəbər verir.
Amerikalı futbolçu ilə 3 illik (2028-ci ilin 30 iyununa qədər) müqavilə imzalanıb. Mönhenqladbax “Borussiya”sı bu transfer üçün Dortmund klubuna 4 milyon avro ödəyib.
İngiltərədə dünyaya göz açmış, “Nyu York Siti”nin yetirməsi olan Covanni Reyna peşəkar karyerasına elə Dortmund “Borussiya”sında başlayıb. O, Dortmund klubunun heyətində 147 oyuna çıxıb, 19 qol vurub, 18 assist edib. Reyna 2024-cü ildə İngiltərənin “Nottingem Forest” klubunda icarədə də olub.
Amerika Birləşmiş Ştatlarının aşağı yaş qrupları üzrə yığmalarında da oynamış Reyna, 2020-ci ildən əsas millidə çıxış edir. O, yığmada 32 oyuna 8 qol vurub, 5 məhsuldar ötürmə müəllifi olub.
“Transfermarkt” internet-portalı 22 yaşlı müdafiəçinin transfer dəyərini 7 milyon avro məbləğində qiymətləndirir.
