Suriya Mərkəzi Bankının sədri Əbdülqədir Husariyyə ölkənin pul və maliyyə islahatları çərçivəsində yeni əsginasların mərhələli şəkildə dövriyyəyə buraxılacağını və onların etibarlı iki və ya üç beynəlxalq mənbədə çap ediləcəyini açıqlayıb.
Rəsmi Suriya xəbər agentliyi SANA-ya danışan Husariyyə bildirib ki, yeni əsginaslar saxtakarlığa qarşı yüksək təhlükəsizlik tədbirləri ilə təchiz olunmuş şəkildə etibarlı beynəlxalq mənbələrdə istehsal olunacaq.
Onun sözlərinə görə, yeni pul vahidlərinin dövriyyəyə buraxılması ölkənin nağd pul sisteminin inkişaf etdirilməsi və gündəlik əməliyyatların asanlaşdırılması məqsədilə atılan texniki və tənzimləyici addımdır. Husariyyə vurğulayıb ki, bu proses pul kütləsini artırmaq üçün deyil, nağd dövriyyəni daha səmərəli idarə etmək və ödəniş sistemlərini sadələşdirmək üçün həyata keçirilir.
Husariyyənin sözlərinə görə, çap ediləcək pul miqdarı ölkə iqtisadiyyatının ehtiyaclarına uyğun olaraq həssaslıqla müəyyən ediləcək. İlk mərhələdə yeni əsginaslar mövcud pullarla yanaşı tədricən dövriyyəyə buraxılacaq, hazırkı əsginaslar isə dövriyyədən çıxarılmayacaq.
O, ikinci mərhələdə köhnə əsginasların yeniləri ilə əvəzlənməyə başlanacağını, üçüncü mərhələdə isə bu prosesin yalnız Suriya Mərkəzi Bankı vasitəsilə aparılacağını qeyd edib.
Husariyyə yeni əsginasların yüksək texniki standartlara malik olacağını, bunun sayəsində milli valyutaya inamın artmasının və istifadəçilərin hüquqlarının qorunmasının hədəfləndiyini vurğulayıb.
O, həmçinin yeni əsginaslarla bağlı detalları ictimaiyyətlə bölüşmək üçün ölkə miqyasında maarifləndirici kampaniya başlatmağı planlaşdırdığını bildirib.
