Braziliyanın San-Paulu sahillərində yerləşən Ilha da Keimada Qrandi, daha çox “İlanlar adası” kimi tanınır. Bu ada dünyanın ən zəhərli ilanlarından hesab edilən Qolden Lanshed (Bothrops insularis) növü ilə məşhurdur.
Ölkə.Az xəbər verir ki, cəmi 43 hektar sahəsi olan ada San-Paulu sahilindən təxminən 33 kilometr uzaqlıqda yerləşir. Burada ilanların sıxlığı heyrətamiz dərəcədə yüksəkdir: hər kvadrat metrdə 2-dən 5-ə qədər zəhərli ilan rast gəlinir. Bu səbəbdən ada gündəlik səfərlər üçün açıq deyil. Buraya yalnız xüsusi icazəsi olan tədqiqatçılar və mütəxəssislər daxil ola bilir.
İlanların zəhəri tibbdə antivenom – yəni zəhər əleyhinə serumların hazırlanmasında istifadə olunur. Braziliya hökuməti həm insanların təhlükəsizliyini təmin etmək, həm də nadir ilan növünü qorumaq üçün adaya sərbəst girişə məhdudiyyət qoyub.
“İlanlar adasının” unikal xüsusiyyəti ondadır ki, burada başqa yırtıcı heyvanlar yaşamır. Bu amil ilanların saysız-hesabsız çoxalmasına və adada yeganə yırtıcı kimi hökm sürməsinə səbəb olub. Onların əsas qida mənbəyi isə adaya gələn müxtəlif quşlardır.
Beləliklə, Ilha da Keimada Qrandi həm bioloqlar üçün mühüm tədqiqat məkanı, həm də dünyanın ən təhlükəli yerlərindən biri kimi tanınır.
