13-14 sentyabr tarixlərində Şamaxı şəhərində növbəti Üzüm və Şərab Festivalı baş tutacaq. Tədbir Meysəri kəndində yerləşən “Şirvan şərabları” MMC-nin üzümçülük və şərabçılıq kompleksi ərazisində keçiriləcək. Festivalda 24 şərab brendi təmsil olunacaq.
Festivalın məqsədi
İki gün davam edəcək festivalın əsas məqsədi yerli üzüm və şərab istehsalını təşviq etmək, şərab məhsullarının ixrac potensialını artırmaq, Azərbaycanda üzümçülük və şərab istehsalı tarixini, həmçinin bu sahədə görülən işləri geniş ictimaiyyətə çatdırmaqdır. Festival həm də şərab istehsalçıları üçün yeni işgüzar əlaqələr qurmaq və məhsullarını daha geniş auditoriyaya tanıtmaq üçün mühüm platforma olacaq.
Festival iştirakçılarını gözləyən yeniliklər
Bu il festival çərçivəsində üzüm istehsalı, şərabçılıq və ölkənin turizm potensialı ilə bağlı hər gün müxtəlif maarifləndirici və əyləncəli tədbirlər təşkil olunacaq.
Festival ərazisində ziyarətçilər üçün sərgi, əyləncə və master-klas zonaları, eləcə də məşhur restoranların pavilyonları fəaliyyət göstərəcək. Qonaqlar yerli və xarici istehsalçıların şərab məhsullarını dequstasiya edə, bəyəndikləri məhsulları zavod qiymətinə əldə edə, ustad dərslərində iştirak edə və şərab evlərinin maraqlı hekayələrini dinləyə biləcəklər.
Bundan əlavə, festival günlərində maraqlı şou proqramlar da keçiriləcək. Tədbir üzümçülük və şərabçılıq sahəsində həm peşəkarlar, həm də bu sahəyə marağı olan şəxslər üçün unudulmaz təcrübə vəd edir.
İştirakçılar üçün nəqliyyat xidməti də təşkil olunacaq.
Üzüm və Şərab Festivalına öz şəxsi nəqliyyat vasitəsi ilə getmək istəyənlər üçün biletin qiyməti 20 manat, xüsusi ayrılmış avtobuslarla getmək istəyən şəxslər üçün isə 40 manatdır. Biletləri “İticket.az“ saytından əldə etmək mümkündür.
Qeyd edək ki, Üzüm və Şərab Festivalı üçün xüsusi ayrılmış avtobuslar Heydər Əliyev Mərkəzinin dayanacağından 13 sentyabr saat 11:30-da yola düşəcək.
Şamaxıdan Bakıya geri dönüş reysləri isə 13 və 14 sentyabrda saat 20.40-da yola çıxacaq.
Üzüm və Şərab Festivalı haqqında
Qeyd edək ki, Üzüm və Şərab Festivalı ilk dəfə 2019-cu ildə təşkil olunub. Festival ənənəvi olaraq Şamaxı rayonunun Meysəri kəndində keçirilir. Festivalın əsas məqsədi yerli üzüm və şərab istehsalını təşviq etmək, eyni zamanda şərab məhsullarının ixrac potensialının artırılmasıdır. Üzüm və Şərab Festivalı Azərbaycanda üzümçülük və şərab istehsalı tarixinin, bu sahədə görülən işlərin geniş ictimaiyyətə çatdırılmasında mühüm rol oynayır.
