Ryazan yaxınlığındakı “Elastik” zavodunun barıt sexində partlayış baş verib. Hadisə nəticəsində 5 nəfər ölüb, 100-dən çox insan yaralanıb. Rayon rəhbəri bələdiyyə səviyyəsində fövqəladə vəziyyətin tətbiqi barədə göstəriş verib. İstintaq Komitəsi artıq cinayət işi açıb. Bu, müəssisədə ilk fövqəladə hadisə deyil - dörd il əvvəl də partlayış olub.
Ryazan vilayətində “Elastik” zavodunun barıt sexində baş verən yanğından sonra partlayış baş verib. Qubernator Pavel Malkovun sözlərinə görə, 5 nəfər ölüb, 100-dən çox insan yaralanıb.
“Bütün zərərçəkənlərə psixoloji yardım da daxil olmaqla bütün lazımi yardımlar göstərilir”, o, Telegram kanalında vurğulayıb.
Regional operativ qrup zərərçəkənlərin Şilovo kəndindəki bələdiyyələrarası tibb məntəqəsinə göndərildiyini bildirib. Yardımın göstərilməsinə regional hakimiyyət orqanları nəzarət edir.
Zavodda baş verən partlayış hadisə şahidləri tərəfindən lentə alınıb. Kadrlarda müəssisənin ərazisində alov dilləri və nəhəng tüstü sütunu görünür.
Hadisədən sonra 100-dən çox işçi təxliyə edilib, lakin daha azı 20 nəfər tikililərin dağıntıları altında qalıb.
Baza Telegram kanalının məlumatına görə, onlara daxil olmaq çətindir.
Bundan əlavə, partlayışın nəticələrinin aradan qaldırılması üçün qərargah yaradılıb. Onun tərkibinə müvafiq idarə və hüquq-mühafizə orqanlarının rəhbərləri daxildir. Malkov bələdiyyə səviyyəsində fövqəladə vəziyyətin tətbiqi barədə göstəriş verib.
Fövqəladə Hallar Nazirliyinin əməkdaşları hadisə yerində işi davam etdirir - Rusiya Fövqəladə Hallar Nazirliyinin 70 mütəxəssisi və 28 texnikası cəlb olunub. Şöbədən əmin ediblər ki, yaşayış sektoru üçün heç bir təhlükə yoxdur. RİA Novosti aşkar edib ki, partlayış yerindən yaşayış sahəsinə qədər olan məsafə iki kilometrdir, partlayış zonası zavoddan kənara çıxmır.
Əziz Mustafa
