Yunanıstan məhkəməsi Moldova tərəfindən Vladimir Plahotnyuk barəsində verilmiş ekstradisiya tələbini təmin edib. Məlumata görə, Plahotnyuk 20 milyard dolların yuyulmasında ittiham olunur.
Onun ekstradisiyası üçün Rusiya da rəsmi müraciət göndərmişdi, lakin Moldova hüquq-mühafizə orqanları bu addımın Plahotnyuka siyasi himayə və toxunulmazlıq təmin etmək məqsədi daşıya biləcəyini açıqlayıb.
Vladimir Plahotnyuk, 2010-cu illərdə Moldova siyasətində ən nüfuzlu fiqurlardan biri hesab olunurdu. Hökumət, parlament və təhlükəsizlik strukturlarına təsiri ilə tanınırdı. 2015-ci ildə sabiq baş nazir İon Sturza bəyan etmişdi: “Moldova – Plahotnyukun ələ keçirdiyi dövlətdir.”
2019-cu ildə baş verən siyasi böhrandan sonra ölkədən qaçan Plahotnyuk barəsində pul yuma, narkotik şəbəkələrinin yaradılması və qətl sifarişi kimi ağır ittihamlarla cinayət işləri açılıb. Moldova və Rusiya eyni vaxtda onun ekstradisiyası üçün müraciət edib.
The Insider jurnalistlərinin əldə etdiyi sənədlərə əsasən, Plahotnyuk “Mixail Tauşanov” adı altında Rusiya ərazisinə dəfələrlə səfər edib. Bu səfərlər onun beynəlxalq axtarışda olduğu dövrə təsadüf edir. 2024-cü il iyunun 4-də Moskvada Rusiya Prezident Administrasiyası rəhbərinin müavini Dmitri Kozak ilə gizli görüş keçirdiyi bildirilir. Plahotnyuk bu görüşə Dubaydan uçub, “National” otelində yerləşib və hərəkəti nömrəsiz avtomobil ilə təmin olunub.
2025-ci il iyulun 22-də Plahotnyuk Yunanıstanda saxlanılıb. Üzərində Ukrayna, Rusiya və Bolqarıstana məxsus saxta pasportlar aşkarlanıb. Onlardan biri Mixail Tauşanov adına tərtib olunmuşdu.
Hazırda Moldovada onun geri qaytarılması və mühakimə olunması üçün hüquqi prosedurlar davam etdirilir.
