Hörümçək adam kostyumunu geyinmək Tom Holland üçün yeni bir şey deyil. Bununla belə, 29 yaşlı aktyor deyir ki, franşizanın qarşıdan gələn hissəsi olan “Hörümçək adam: Yeni gün” (Spider-Man: Brand New Day) üçün kostyumu ilk dəfə geyinəndə "bu dəfə fərqli hiss etdim".
Hafta.az-ın “Hollywood Reporter”a istinadən yazdığına görə, Sony/Marvel birgə istehsalının dördüncü hissəsinin çəkilişləri bu ay Qlazqoda başlayıb. Aktyor ötən gün İnstaqramda paylaşdığı paylaşımda ikonik superqəhrəman kostyumunda keçirdiyi "ilk günü" xatırlayıb.
Holland bir dəqiqəlik videoda "Hörümçək adam”da dördüncü "ilk günümdür" deyir: "Bilirsiniz, kostyumu geyinmək qəribə hissdir. Bu dəfə hər şey fərqli hiss olunur. İlk gün çəkiliş meydançasına pərəstişkarlarımız da gəlmişdi. Bunu onlarla bölüşmək həqiqətən həyəcanvericidir".
Holland əlavə edir: "Mən yalnız əlimdən gələni edəcəyəm. Ümid edirəm ki, düzgün başa düşəcəm".
Britaniyalı aktyor avqustun 3-də əvvəlki üç filmdə geyindiyi geyimlərlə müqayisədə sinəsində daha böyük hörümçək olan yeni “Hörümçək adam” kostyumunu təqdim edib.
Daha əvvəl Hollandın Mark Ruffalo, Maykl Mando və Con Berntalla birlikdə “Brand New Day” filmində rol alacağı açıqlanmışdı. “Stranger Things” filmində baş rolu oynayan gənc aktrisa Sadie Sink də aktyor heyətinə qatılıb.
Rejissor Destin Daniel Kretton tərəfindən çəkilmiş super qəhrəman filminin süjet təfərrüatları gizli saxlanılır.
“Hörümçək adam: Yeni gün” 31 iyul 2026-cı ildə nümayişə buraxılacaq.
