"Çətin oyun oldu”.
İdman.biz Teleqraf-a istinadən xəbər verir ki, bunu “Araz-Naxçıvan”ın futbolçusu Rahil Məmmədov evdə Kipr "Omoniya"sına 0:4 hesabı ilə uduzduqları UEFA konfrans Liqasının III təsnifat mərhələsinin ilk matçından sonra jurnalistlərə açıqlamasında deyib.
30 yaşlı müdafiəçi komandasının yorğun olduğunu bildirib: “Çünki “Aris”lə son oyunda qırmızı vərəqə almışdıq, eləcə də Yunanıstandan bura uzun yol qət etmişdik”.
O, cavab görüşündə geridönüşə inandığını söyləyib: “Futbolda hər şey mümkündür, mən inanıram. Çətin rəqib olduqlarını bilirdik, futboldur, belə alındı. Cavab oyununa hazırlaşacağıq”.
Məmmədov Polşa “Radomyak”ından ayrılmasının səbəbini belə izah edib: “Klubumu dəyişmək niyyətində idim. “Araz-Naxçıvan” məni ən çox istəyən klub idi. Komandada məni yaxşı qarşıladılar. Futbolçuların çoxunu da əvvəldən tanıyıram”.
O, milli komandadan hər zaman dəvət gözlədiyini vurğulayıb: “Millidə oynamağı həmişə istəyirəm. Formada olsam və dəvət alsam, gedib kömək edəcəyəm”.
Məmmədov DÇ-2026 seçmə mərhələsindəki rəqiblər barədə də söz açıb: “Rəqiblərimiz elə komandalardır ki, onlar barədə hamının məlumatı var. Bu oyunlarda öz gücümüzü verəcəyik. Hazırlıqlı olub-olmadığımızı oyunlarda görəcəyik. Futbolda işlər hər zaman yaxşı olmur. AFFA-da da köklü dəyişikliklər olub…”
O, azarkeşlərdən dəstək istəyib: “Mənim performansım bir az aşağı ola bilər. Özümdən daha da yaxşısını gözləyirəm. İndiyə kimi bizi dəstəkləyən azarkeşlərə, sayları az olsa da, təşəkkür edirəm. Onların sağlam tənqidlərini qəbul edirəm”.
İdman.biz
