BP şirkəti Qusar rayonunun Avaran kəndində həyata keçirdiyi su təchizatı layihəsinin birinci mərhələsinin tamamlandığını elan edib.
Bu barədə şirkətə istinadən xəbər verir. Layihə, BP-nin Azərbaycanda kənd icmalarında su şəraitini yaxşılaşdırmağa yönəlmiş genişmiqyaslı su təchizatı proqramının bir hissəsidir. Bu təşəbbüs şirkətin su qıtlığı yaşanan bölgələrdə təmiz su resurslarından xalis istifadəsini azaltmaq məqsədinə xidmət edir. BP bu məqsədə həm öz əməliyyatlarında suyun daha səmərəli istifadəsi, həm də tərəfdaşlarla əməkdaşlıq çərçivəsində təmiz su ehtiyatlarının bərpası vasitəsilə nail olmağı hədəfləyir.
Avaran kəndində həyata keçirilmiş layihə çərçivəsində 10 000 kubmetr tutumlu, membranla örtülmüş yeni su anbarı və 2 000 kubmetr tutumlu çöküntü hovuzu inşa olunub. Eyni zamanda, Cəgər Cibir su kanalından anbara su daşıyan 1,4 km uzunluğunda yeni boru xətti çəkilib. Layihə çərçivəsində nasos və filtrasiya stansiyaları, su çənləri, həmçinin 125 ailənin su şəbəkəsinə birbaşa qoşulmasını təmin edən infrastruktur qurulub.
Layihənin birinci mərhələsinin başa çatması münasibətilə kənddə təşkil olunan tədbirdə çıxış edən BP-nin Xəzər regionu üzrə vitse-prezidenti Bəxtiyar Aslanbəyli bildirib:
“Avaran kənd icmasının təmiz suya birbaşa çıxış əldə etməsinə dəstək verməkdən məmnunuq. Bu layihə kənd icmalarında su şəraitinin yaxşılaşdırılmasına yönəlmiş öhdəliyimizin mühüm hissəsidir. Bu təşəbbüs yerli icmalara və ekosistemlərə əhəmiyyətli fayda verir və şirkətimizin qlobal məqsədlərinə uyğunluğunu bir daha nümayiş etdirir”.
Onun sözlərinə görə, birinci mərhələnin uğurlu nəticələri BP-ni layihənin ikinci mərhələsinə də ruhlandırıb: “Yeni mərhələdə əlavə 263 ailə təmiz su ilə təmin ediləcək. Hazırda işlər davam edir və layihənin 2025-ci ilin sonuna qədər tam istifadəyə verilməsi planlaşdırılır”.
Layihənin birinci mərhələsinin ümumi dəyəri 810 390 manat (476,7 min ABŞ dolları) təşkil edib. İcra Regional İnkişaf İctimai Birliyi (RİİB) tərəfindən həyata keçirilib.
Qeyd edək ki, BP-nin Azərbaycanda kənd icmaları üçün reallaşdırdığı su təchizatı proqramı 2023-cü ilin noyabrında başlayıb və 2026-cı ilin aprelində tamamlanması planlaşdırılır. Ümumi dəyəri 5 milyon 265 min 556 manat (3 milyon 097 min 385 ABŞ dolları) olan proqram üç əsas komponentdən ibarətdir.
Birinci komponent Tovuz rayonunda yerləşən Dovşanlı və Məhəmmədəli kəndlərindəki ənənəvi yeraltı su kanalları – kəhrizlərin bərpasını nəzərdə tutur. Layihənin nəticəsində Aşağı Quşçu kəndinin 10 000-dən çox sakininin faydalanacağı gözlənilir. Layihənin dəyəri 1 milyon 282 min 227 manat (754,251 min ABŞ dolları) təşkil edir və icrası “Puls-R” MMC-yə həvalə olunub. İşlərin 2025-ci ilin dekabrında başa çatdırılması planlaşdırılır.
İkinci komponent çərçivəsində 2025-ci ilin iyununda həm Göyçay, həm də Qusar rayonlarında layihələr uğurla başa çatdırılıb. Layihələrin ümumi dəyəri 2 milyon 388 min 130 manat (1 milyon 404 min 782 ABŞ dolları) təşkil edir və onların icrası Regional İnkişaf İctimai Birliyi tərəfindən həyata keçirilib. Göyçayda layihənin sonuna 100 hektardan çox əkin sahəsi su ilə təmin olunub. Buraya Kənd Təsərrüfatı Nazirliyinin Meyvəçilik və Çayçılıq ET İnstitutuna məxsus 83 hektar və yerli fermerlərə aid 15 hektar sahə daxildir. Su sisteminin illik ötürücülük qabiliyyəti 500 min kubmetr təşkil edir. Qusarda (Avaran kəndi) membranla örtülmüş 10 000 kubmetrlik su anbarı, 2 000 kubmetrlik çöküntü hovuzu və 1,4 km-lik boru xətti inşa olunub. 125 ailə birbaşa su şəbəkəsinə qoşulub.
Üçüncü komponent çərçivəsində icma tərəfindən idarə olunan su layihələri Kürdəmir, Yevlax, Goranboy və Samux rayonlarında 15 icmanı əhatə edir. Məqsəd 10 000-ə yaxın kənd sakini üçün içməli su, suvarma və kanalizasiya sistemlərinin qurulmasıdır. Layihənin ümumi dəyəri 1 milyon 595 min 200 manat (938 352 ABŞ dolları) təşkil edir və “Ümid” Sosial İnkişafa Dəstək İctimai Birliyi tərəfindən həyata keçirilir. 2023-cü ilin noyabrında başlanan layihənin 2026-cı ilin aprelində tamamlanması nəzərdə tutulur. Bu günə qədər 15 icmadan 13-də işlər yekunlaşıb, qalan 2 icmada isə işlərin yaxın müddətdə başa çatdırılması planlaşdırılır.
