ABŞ Prezidenti Donald Tramp növbəti dəfə Federal Ehtiyat Sisteminin sədri Cerom Paueli istefaya çağırıb.
Yeniavaz.com xəbər verir ki, bu barədə ABŞ prezidenti sosial şəbəkə hesabında yazıb.
“ABŞ-nin əvvəlki prezidenti Co Bayden tərəfindən təyin olunmuş Adriana Kuqler istefa verdiyi kimi, gecikmiş Pauel də istefa verməlidir. Kuqler bilirdi ki, Pauel faiz dərəcələri ilə bağlı səhv edib. O da istefa verməlidir”, - prezident yazıb.
Qeyd edək ki, cümə günü Kuqler avqustun 8-də FED idarə heyətini tərk edəcəyini deyib.
ABŞ prezidenti dəfələrlə vurğulayıb ki, onun fikrincə, FED faiz dərəcəsini aşağı salmalıdır. Tramp iddia edib ki, maliyyə tənzimləyicisi federal hökumət üçün borclanma xərclərini yüksək saxlamaq üçün bunu qəsdən etmir. Ağ Ev bildirib ki, FED siyasi maraqları rəhbər tutur və onun qubernatorlar şurasında Trampa qarşı çıxan çoxlu insanlar var.
İyulun 30-da FED iclasdan sonra uçot dərəcəsini 4,25-4,5% səviyyəsində saxladı. Pauel dəfələrlə bəyan edib ki, istefa vermək niyyətində deyil. Onun səlahiyyət müddəti 2026-cı ilin mayında başa çatacaq. FED 1913-cü ildə Konqres tərəfindən federal hökumətin tərkibində müstəqil təşkilat kimi yaradılıb. Rəsmi olaraq prezidentə deyil, birbaşa Konqresə hesabat verir.
